ایران کے خلاف ٹرمپ کے جنگی اختیارات چھیننے کی کوشش پھر ناکام

واشنگٹن (23 اپریل ): امریکی سینیٹ نے ایران کے معاملے میں صدر ڈونلڈ ٹرمپ کے جنگی اختیارات کو محدود کرنے کی کوشش کرنے والی قرارداد کو پانچویں بار مسترد کر دیا، ریپبلکنز ایک بار پھر کامیاب ہو گئے۔ امریکی میڈیا کے مطابق رواں برس پانچویں مرتبہ سینیٹ نے ایک ایسی تجویز کو رد کر دیا جس کا مقصد صدر ڈونلڈ ٹرمپ کے جنگی اختیارات کو محدود کرنا تھا، تاکہ ایران کے خلاف کسی بھی آئندہ فوجی کارروائی کے لیے کانگریس کی منظوری لازمی قرار دی جا سکے۔ ریپبلکنز نے یہ قرارداد 46 کے مقابلے میں 51 ووٹوں سے ناکام بنا دی، ڈیموکریٹ سینیٹر جان فیٹر مین نے ریپبلکنز کے ساتھ ووٹ دیا، جب کہ ریپبلکن سینیٹر رینڈ پال نے ڈیموکریٹس کے ساتھ ووٹ دیا۔ سینیٹ میں اقلیتی رہنما چک شومر نے گزشتہ ہفتے اعلان کیا تھا کہ ڈیموکریٹس مستقبل قریب میں ہر ہفتے ٹرمپ کے جنگی اختیارات سے متعلق ووٹنگ کروانے کی کوشش کریں گے۔ کچھ ریپبلکن سینیٹرز، جیسے تھام ٹِلس اور لیزا مرکاؤسکی، نے عندیہ دیا ہے کہ وہ اُس وقت اس قرارداد (کہ ایران کے خلاف فوجی کارروائی کی منظوری لی جائے) پر ووٹنگ کی حمایت کریں گے جب جنگ 60 دن کی حد کو پہنچ جائے، جب کہ سینیٹ کی ریپبلکن قیادت نے یہ امکان رد نہیں کیا کہ اگر 90 دن تک بھی جنگ ختم نہ ہوئی تو وہ بھی ایسا قدم اٹھا سکتے ہیں۔

Source: social media