ایران کے امریکا سے رابطے منقطع نہیں ہوئے، ایرانی وزیر خارجہ

ایرانی وزیر خارجہ عباس عراقچی کا کہنا ہے کہ امریکا کے ساتھ رابطے منقطع نہیں ہوئے لیکن مذاکرات میں کوئی پیش رفت نہیں ہے۔ لبنانی چینل کو انٹرویو میں ایرانی وزیر خارجہ عباس عراقچی نے کہا کہ اسرائیل بیروت پر حملہ کرے گا تو ایران فیصلہ کن جواب دے گا۔ ان کا کہنا تھا کہ ایران اور امریکا تبادلہ کیے گئے متن کا جائزہ لے رہے ہیں۔ دوسری جانب ترجمان ایرانی پاسداران انقلاب کا کہنا ہے کہ ایران نے کویت کے ہوائی اڈے پر حملہ نہیں کیا۔ ترجمان پاسداران انقلاب نے کہا کہ ہوائی اڈے پر تباہی ایرانی میزائل روکنے کے دوران امریکی دفاعی نظام میں خرابی کے باعث ہوئی۔ سینٹرل کمانڈ نے ترجمان ایرانی پاسداران انقلاب کے بیان کی تردید کرتے ہوئے دعویٰ کیا کہ کویت ایئرپورٹ کو امریکی میزائل انٹرسیپٹر سے نقصان نہیں پہنچا ہے۔ کویتی وزارت خارجہ کی ایران کے ڈرون، میزائل حملوں کی شدید مذمت کی ہے اور ایرانی سفارتی عملے میں کمی کا فیصلہ کیا ہے۔ ایرانی ناظم الامور کو دفتر خارجہ طلب کرلیا گیا ہے، دو ایرانی سفارت کاروں کو ناپسندیدہ قرار دے کر چوبیس گھنٹوں میں کویت چھوڑنے کا حکم بھی دیا گیا ہے۔ واضح رہے کہ کویت ایئرپورٹ پر حملے میں ایک بھارتی شہری ہلاک، تریسٹھ افراد زخمی ہوئے ہیں، ایرانی حملے کے کچھ گھنٹے بعد کویت انٹرنیشنل ایئرپورٹ کھول دیا گیا تھا۔

Source: social media