ایران اور اسرائیل کا فی الحال ایک دوسرے پر حملے روکنے کا اعلان

ایران اور اسرائیل نے کہا ہے کہ انہوں نے ایک دوسرے پر حملے روک دیے ہیں ۔ عرب نیوز کے مطابق یہ پیش رفت امریکی صدر ٖڈونلڈ ٹرمپ کی جانب سے فائرنگ روکنے کی اپیل کے بعد سامنے آئی ہے لیکن ایران نے کہا ہے کہ اگر اسرائیل نے حزب اللہ کو نشانہ بنایا تو وہ دوبارہ حملے شروع کر دے گا۔ یہ حملے دو ماہ قبل ہونے والی جنگ بندی کے بعد کشیدگی میں سب سے سنگین اضافہ تھی اور اس نے مشرقِ وسطیٰ کو دوبارہ جنگ کے دہانے پر پہنچا دیا تھا۔ ایک سینیئر اسرائیلی عہدیدار کے مطابق اسرائیل نے ایران پر حملے روکنے کا فیصلہ کیا ہے، تاہم چینل 12 نے رپورٹ کیا کہ اگر حزب اللہ نے اسرائیلی شہروں پر حملے جاری رکھے تو اسرائیل بیروت کے جنوبی علاقوں پر دوبارہ حملہ کرے گا۔ دوسری جانب ایران کی فوج نے اعلان کیا ہے کہ اسرائیل پر حملوں کی پہلی لہر ختم ہو گئی ہے، تاہم اگر اسرائیل نے لبنان پر حملے جاری رکھے تو وہ دوبارہ کارروائی کر سکتے ہیں۔ اس سے قبل صدر ٹرمپ نے سوشل میڈیا پر کہا تھا کہ ’اسرائیل اور ایران کو فوری طور پر فائرنگ بند کر دینی چاہیے۔‘ امریکی صدر ڈونلڈ ٹرمپ نے پیر کے روز کہا کہ اسرائیل اور ایران فوری جنگ بندی کے لیے تیار ہیں اور ’امن‘ کے لیے حتمی مذاکرات جاری ہیں۔ انہوں نے اپنے سوشل میڈیا پلیٹ فارم ’ٹروتھ سوشل‘ پر لکھا ’دونوں فریق، اسرائیل اور ایران، فوری جنگ بندی چاہتے ہیں۔ امن کے لیے حتمی مذاکرات جاری ہیں، جب تک حماقت یا غلطی رکاوٹ نہ بنے۔ بلاک مکمل طور پر برقرار رہے گا جب تک حتمی معاہدہ نہ ہو جائے۔ معاملات تیزی سے آگے بڑھنے چاہئیں۔‘ ایک اسرائیلی عہدیدار نے روئٹرز کو بتایا کہ ٹرمپ اور اسرائیلی وزیر اعظم بنیامین نیتن یاہو کے درمیان فون پر بات چیت بھی ہوئی۔

Source: social media