اسرائیل پر ایران کے میزائل حملے 'ناقابل قبول' ہیں: جاپانی وزیرِ اعظم

جاپان کے نئے وزیر اعظم شیگیرو اشیبا نے بدھ کو خطے میں "ہمہ گیر جنگ" کے خلاف خبردار کرتے ہوئے اسرائیل پر ایران کے میزائل حملے کو "ناقابل قبول" قرار دیا ہے۔ منگل کو پارلیمنٹ میں وزیرِ اعظم کے طور پر اپنی تقرری کے بعد ایشیبا نے امریکی صدر جو بائیڈن کے ساتھ فون کال کے بعد یہ تبصرہ کیا۔ انہوں نے صحافیوں کو بتایا، "ایران کا حملہ ناقابلِ قبول ہے۔ ہم اس کی شدید مذمت کرتے ہیں۔ لیکن اس کے ساتھ ہی ہم کشیدگی کم کرنے اور اسے مکمل جنگ کی طرف بڑھنے سے روکنے کے لیے (امریکہ کے ساتھ) تعاون کرنا چاہیں گے۔" 67 سالہ سابق وزیرِ دفاع نیٹو کے خطوط پر باہمی دفاع کے لیے علاقائی فوجی اتحاد کے قیام کی حمایت کرتے ہیں۔ ایشیبا نے کہا کہ جاپان اور امریکہ کا دفاعی اتحاد ان کے پیشرو فومیو کشیدا کے دور میں "نمایاں طور پر مضبوط" ہوا۔ کشیدا نے دفاعی اخراجات کو دوگنا کرنے اور امریکہ اور دیگر ممالک کے ساتھ تعلقات کی بہتری کے لیے کام کیا جن کے لیے چین کا عروج اور روس اور شمالی کوریا کے اقدامات پریشان کن ہیں۔ ایشیبا نے کہا کہ انہوں نے بائیڈن کو بتایا، "میں اس پالیسی کا وارث بننا چاہتا ہوں اور اسے مزید مضبوط بنانے کی کوشش کروں گا۔" انہوں نے جنوبی کوریا، آسٹریلیا، بھارت اور فلپائن کا ذکر کرتے ہوئے مزید کہا، "میں نے ان سے کہا کہ ہم ہم خیال ممالک کا نیٹ ورک بھی مضبوط کرنا چاہیں گے۔" جاپان کی وزارتِ خارجہ نے کہا کہ دونوں رہنماؤں نے چین، شمالی کوریا کے ہتھیاروں کے پروگرام اور یوکرین کی جنگ سے متعلق معاملات پر قریبی تعاون جاری رکھنے پر اتفاق کیا۔ وائٹ ہاؤس نے بھی ایک بیان جاری کیا جس میں کہا گیا کہ بائیڈن نے شیگیرو ایشیبا کو وزیرِ اعظم بننے پر مبارکباد دینے کے لیے فون کیا تھا۔ بیان میں کہا گیا، "صدر نے کہا کہ وہ امریکہ-جاپان عالمی شراکت داری کو مزید گہرا کرنے کے لیے وزیرِ اعظم ایشیبا کے ساتھ مل کر کام کرنے کے منتظر ہیں۔"

Source: social media