عینی شاہدین کے مطابق، جب میڈیکل اسٹوڈنٹس کونسل کی قیادت میں انٹرنز پرنسپل کے دفتر کے باہر احتجاج کر رہے تھے، اسی وقت اچانک کئی افراد وہاں پہنچ گئے۔
چوربگان واقعے کے سلسلے میں مستقبل کے ڈاکٹروں کو وجہ بتاو¿ نوٹس جاری کیے جانے کے بعد کولکاتا میڈیکل کالج کا ماحول کشیدہ ہو گیا۔ نوٹس واپس لینے کے مطالبے پر بدھ کے روز ڈاکٹروں اور طلبہ کے ایک گروپ نے پرنسپل اندرنیل وشواس کا گھیراو¿ کیا۔ بعد میں اکھل بھارتیہ ودیارتھی پریشد (اے بی وی پی) پر الزام عائد کیا گیا کہ اس نے احتجاج کرنے والے ڈاکٹر طلبہ پر حملہ کیا۔ اے بی وی پی کے ساتھ نیشنل میڈیکوس آرگنائزیشن (این ایم او) کے حامی بھی موجود تھے۔ تاہم ان تنظیموں نے حملے کے الزامات کی تردید کی ہے۔
میڈیکل کالج کے طلبہ اور ڈاکٹروں کے ذرائع کے مطابق، بدھ کے واقعے کے خلاف جمعرات کو دوپہر 2 بجے سے اسپتال کے احاطے میں احتجاجی اجتماع منعقد کیا جائے گا۔ اس میں تمام تنظیمیں بغیر کسی بینر کے شرکت کر سکیں گی۔ بعد میں کالج اسٹریٹ تک مارچ بھی نکالا جا سکتا ہے۔
عینی شاہدین کا دعویٰ ہے کہ جب میڈیکل اسٹوڈنٹس کونسل کی قیادت میں انٹرنز پرنسپل کے دفتر کے باہر احتجاج کر رہے تھے، اسی دوران اچانک کئی افراد وہاں پہنچ گئے۔ اس گروپ میں اے بی وی پی کے ریاستی سکریٹری نیل کنٹھ بھٹاچاریہ بھی شامل تھے۔
الزام ہے کہ واقعے کی ویڈیو بنانے کو لے کر پہلے بحث ہوئی اور پھر ہاتھا پائی کی صورت حال پیدا ہو گئی۔ اس کے بعد وہاں تقریباً سو افراد جمع ہو گئے۔ ان لوگوں نے خود کو اے بی وی پی کا حامی بتایا۔ ابتدا میں انہوں نے پرنسپل کے دفتر کے باہر لگے فولڈنگ گیٹ کا تالا بانس سے توڑنے کی کوشش کی۔ پرنسپل کے دفتر کے باہر راہداری کے شیشے بھی توڑ دیے گئے۔ اطلاع ملنے پر پولیس موقع پر پہنچی۔ بعد میں پولیس کی اپیل پر این ایم او کے حامی پرنسپل کے دفتر کے باہر سے ہٹ گئے۔
دوسری جانب، بدھ کے روز بائیں بازو کی تنظیموں اور اے بی وی پی کے درمیان جھڑپوں کے باعث کالج اسٹریٹ میں دن بھر کشیدگی رہی۔ اسی دوران میڈیکل کالج میں میڈیکل اسٹوڈنٹس کونسل کی جانب سے پرنسپل کے گھیراو¿ کا پروگرام جاری تھا۔
الزام ہے کہ کالج اسٹریٹ سے اے بی وی پی کے حامیوں کی ایک بڑی تعداد میڈیکل کالج پہنچ گئی۔ ان میں سے کچھ افراد براہ راست پرنسپل کے دفتر کے باہر پہنچ گئے، جہاں گھیراو¿ کا احتجاج جاری تھا۔ اس کے بعد پہلے بحث و تکرار ہوئی اور پھر ہاتھا پائی کی صورت حال پیدا ہو گئی۔ بعد میں اے بی وی پی کے ساتھ این ایم او کے حامی بھی وہاں جمع ہو گئے۔
نیل کنٹھ بھٹاچاریہ نے کہا، ”صبح سے کالج اسٹریٹ میں بائیں بازو کے لوگ ڈرامہ کر رہے تھے۔ بعد میں میڈیکل کالج میں بھی ڈرامہ شروع ہو گیا۔ بائیں بازو کے طلبہ اور ڈاکٹروں نے پرنسپل کا گھیراو¿ کر رکھا تھا۔ جب ہمیں اس بات کی اطلاع ملی تو ہم میڈیکل کالج پہنچے۔ وہاں ہم پر حملہ کیا گیا اور ہماری قیادت کے خلاف نازیبا الفاظ استعمال کیے گئے۔“
تاہم نیل کنٹھ کا دعویٰ ہے کہ ان کی تنظیم کے کسی بھی کارکن نے کوئی حملہ نہیں کیا۔
میڈیکل اسٹوڈنٹس کونسل سے وابستہ ایک ڈاکٹر طالب علم نے کہا، ”وہ اچانک ہمارے احتجاج میں داخل ہو گئے۔ انہوں نے ہمارے ایک سینئر ساتھی کو مارنے کی کوشش کی۔ جب میں ویڈیو بنانے لگا تو میرا موبائل فون چھین لیا گیا اور میرے ساتھ مار پیٹ کی گئی۔“
دوسری جانب، این ایم او کے جنوبی بنگال کے ریاستی صدر ڈاکٹر رودرنیل نندی نے کہا، ”میڈیکل کالج میں توڑ پھوڑ کا کوئی واقعہ نہیں ہوا۔ گھیراو¿ کرنا کسی بھی صحت مند روایت کا حصہ نہیں ہے۔ ہم اس کی حمایت نہیں کرتے۔ پولیس نے ہمیں وہاں سے ہٹنے کو کہا اور ہم نے اس کی ہدایت پر عمل کیا۔ باہر سے کون لوگ آئے تھے اور ان کی شناخت کیا تھی، اس بارے میں مجھے کوئی معلومات نہیں ہیں۔“
رات کے وقت پرنسپل اندرنیل پولیس کی حفاظت میں میڈیکل کالج کے احاطے سے باہر نکلے۔ ان کے ساتھ میڈیکل کالج اینڈ اسپتال کے ایم ایس وی پی اندرنیل چٹرجی بھی موجود تھے۔
انہوں نے کہا، ”اس معاملے میں شکایت درج کرائی جائے گی۔ پولیس تحقیقات کرے کہ اس طرح کا واقعہ کس نے انجام دیا۔ پرنسپل پولیس کے پاس شکایت درج کرائیں گے۔ جس طرح اینٹیں پھینکی گئیں، اس سے ہم سب خوفزدہ ہو گئے تھے۔“
واضح رہے کہ سَپتمی کے دن چورباغان کے درگا پوجا پنڈال میں بھگدڑ مچنے سے 19 افراد کی موت ہو گئی تھی۔ اس واقعے میں زخمی ہونے والوں کا علاج کولکاتا میڈیکل کالج میں جاری تھا۔ بعد میں وزیر اعلیٰ شوبھندو ادھیکاری نے زخمیوں کو سَوبھومی کے قریب واقع ایک نجی اسپتال میں منتقل کرنے کا فیصلہ کیا تھا۔
اس فیصلے پر تنقید کرتے ہوئے جونیئر ڈاکٹروں نے میڈیکل کالج کے احاطے میں ایک پریس کانفرنس کی تھی۔ ان کا کہنا تھا کہ سرکاری طبی نظام میں میڈیکل کالجوں کا مقام سب سے اعلیٰ ہے۔ ایسے میں میڈیکل کالج سے کسی مریض کو دوسرے اسپتال میں ریفر کیسے کیا جا سکتا ہے؟ اسی پریس کانفرنس میں یہ دعویٰ بھی کیا گیا تھا کہ خون بہنے سے روکنے والی دوا ٹرانیکسامک (Tranexamic) بھی دستیاب نہیں تھی۔
ان بیانات کی حقیقت جاننے کے لیے وزیر اعلیٰ نے تحقیقات کا حکم دیا تھا۔ اسی تحقیق کے سلسلے میں بدھ کے روز کولکاتا میڈیکل کالج انتظامیہ نے آٹھ انٹرنز کو وجہ بتاو¿ نوٹس جاری کیا۔
وجہ بتاو¿ نوٹس میں کہا گیا تھا کہ ڈیوٹی کے دوران میڈیا کے سامنے بیان نہیں دیا جا سکتا۔ نیشنل میڈیکل کمیشن کے ضوابط میں بھی اس بات کا ذکر ہے۔ اس کے ساتھ ہی خون بہنے سے روکنے والی دوا کی عدم دستیابی سے متعلق دعوے کو بھی بے بنیاد قرار دیا گیا تھا۔ اسی لیے آٹھ انٹرنز سے وضاحت طلب کی گئی تھی کہ ان کے خلاف نظم و ضبط کی خلاف ورزی کے الزام میں کارروائی کیوں نہ کی جائے۔
اس کے بعد بدھ کے روز کالج کونسل کی میٹنگ میں جونیئر ڈاکٹروں کے نمائندوں نے وجہ بتاو¿ نوٹس جاری کرنے کی وجہ دریافت کی۔ ان کا دعویٰ ہے کہ میٹنگ میں اس بات کی تصدیق ہو گئی کہ واقعے کے دن ایمرجنسی ڈپارٹمنٹ میں ٹرانیکسامک سمیت دیگر دوائیں واقعی دستیاب نہیں تھیں۔
اسی بنیاد پر فیصلہ کیا گیا تھا کہ ان آٹھ انٹرنز کو جاری کیے گئے وجہ بتاو¿ نوٹس واپس لے لیے جائیں گے۔ لیکن الزام ہے کہ بعد میں پرنسپل اندرنیل وشواس کالج کونسل کی میٹنگ کے فیصلے سے پیچھے ہٹ گئے۔ اس کے بعد ہی پرنسپل کا گھیراو¿ شروع ہوا۔ اطلاعات کے مطابق، شعبوں کے سربراہان کا بھی گھیراو¿ کیا گیا تھا۔
عینی شاہدین کے مطابق، جب میڈیکل اسٹوڈنٹس کونسل کی قیادت میں انٹرنز پرنسپل کے دفتر کے باہر احتجاج کر رہے تھے، اسی وقت اچانک کئی افراد وہاں پہنچ گئے۔...
Source: Admin