ایلن پارک میں پہلی بار درگا پوجا ہوگی اور چیف منسٹر اس کا افتتاح کریںگے
پوجا کے دنوں میں پارک اسٹریٹ جیسے سوتیلی ماں کا سلوک جھیلتی ہے۔ سَپتمی سے دَشمی تک شہر کے مرکز میں عام دنوں میں مصروف رہنے والی یہ سڑک تقریباً سنسان پڑی رہتی ہے۔ شری بھومی سے لے کر سنتوش مترا اسکوائر اور چیتلا اگراَنی تک جب لوگوں کے ہجوم کو سنبھالنا مشکل ہو جاتا ہے، تب دوپہر اور رات کے وقت پارک اسٹریٹ پر بھیڑ کے نام پر صرف چند کھانے پینے کے شوقین افراد ہی نظر آتے ہیں۔ اس سڑک پر کوئی درگا پوجا نہیں ہوتی تھی، یعنی اب تک نہیں ہوتی تھی۔
ریاست میں اقتدار کی تبدیلی ہوئی ہے اور پارک اسٹریٹ بھی بدل رہی ہے۔ اس سال پہلی بار کرسمس کے موقع پر جشن کے لیے مشہور ایلن پارک میں درگا پوجا ہوگی۔ اس کے منتظمین کولکاتا سَناتنی سنگھ ہیں۔ پورے شہر میں ٹیزر ہورڈنگ لگائے گئے ہیں، جن پر لکھا ہے، ”کون آ رہا ہے؟“
کولکاتا سَناتنی سنگھ کے سکریٹری نوین مشرا، بھوانی پور حلقے میں شوبھندو ادھیکاری کے انتخابی ایجنٹ رہ چکے ہیں۔ وہ کہتے ہیں، ”اس سے پہلے دو تین مرتبہ پوجا منعقد کرنے کی کوشش کی تھی، لیکن اجازت نہیں ملی۔ اب سَناتنی حکومت آنے کے بعد یہ موقع پیدا ہوا ہے۔“ گنیش چوتھی کے دن بھومی پوجن ہوگا۔ سنگھ کے صدر شنکودیپ پانڈا نے کہا، ”مہالیہ کے اگلے دن وزیر اعلیٰ پوجا کا افتتاح کریں گے۔“
ایلن پارک کا رنگ بھی بدل رہا ہے۔ پوری ریاست کی طرح یہاں بھی اب تک نیلے اور سفید رنگ کا غلبہ تھا، لیکن اب رودراکش کے رنگ کی تہہ چڑھائی جا رہی ہے۔ منڈپ کی تعمیر سبرت مکھرجی کریں گے۔ منتظمین فی الحال مورتی بنانے والے فنکار کا نام بتانے سے گریز کر رہے ہیں۔
ہر سال کرسمس کے موقع پر دھرم تلا کی جانب والے موڑ سے تقریباً ملک بازار موڑ تک تقریباً دو کلومیٹر طویل سڑک روشنیوں سے سج جاتی تھی۔ اس بار یہ سجاوٹ دو ماہ پہلے ہی شروع ہو جائے گی۔ آدھی سڑک کو چندن نگر کے روشنی کے فنکار سجائیں گے، جبکہ باقی آدھے حصے میں کانتھی کے فنکار روشنیوں کا نظارہ پیش کریں گے۔
مہالیہ سے ہی پوجا کے احاطے میں اشلوک اور ستوتر پاٹھ شروع ہو جائے گا۔ چوتھی سے بنگال کے لوک فنکار اور قومی سطح کے فنکار پروگرام پیش کریں گے۔ منتظمین کے مطابق، اشٹمی کی آرتی میں بھی خاص کشش ہوگی۔ایلن پارک کی پوجا میں بی جے پی کے بڑے رہنماو¿ں کی آمد متوقع ہے۔ ریاست کے رہنماو¿ں کے علاوہ بی جے پی کے زیر اقتدار کئی ریاستوں کے وزرائے اعلیٰ بھی یہاں آ سکتے ہیں، ایسی اطلاع ہے۔
ایلن پارک میں نئے سرے سے پوجا کا اہتمام کیوں کیا جا رہا ہے؟ شنکودیپ پانڈا کا جواب ہے، ”اب تک یہاں پوجا کیوں نہیں ہوئی؟“ وہ بھی کہتے ہیں کہ سَناتنی حکومت آئی ہے، اس لیے پوجا ہوگی۔
تو کیا پارک اسٹریٹ میں کرسمس کا جشن اب ماضی بن جائے گا؟ سَناتنی سنگھ کے سکریٹری کا جواب ہے، ”کرسمس بھی ہوگا اور پوجا بھی ہوگی۔ ہم ہر مذہب کا احترام کرتے ہیں۔ کرسمس کے موقع پر بھی ایلن پارک روشنیوں سے جگمگائے گا۔“