اکشے اور ٹوئنکل نے اپنا لگژری اپارٹمنٹ 80 کروڑ میں فروخت کردیا

بالی وڈ کی مشہوری جوڑی اکشے کمار اور ٹوئنکل کھنہ نے اپنا لگژری اپارٹمنٹ کروڑوں روپے میں فروخت کردیا۔ میڈیا کے مطابق اکشے کمار اور ان کی اہلیہ ٹوئنکل کھنہ نے ممبئی کے علاقے ورلی میں واقع اپنا پرتعیش اپارٹمنٹ 80 کروڑ روپے میں فروخت کیا ہے۔ میڈیا رپورٹس کے مطابق یہ اپارٹمنٹ ورلی کے مہنگے علاقے میں ہیں جو 360 ویسٹ ٹاور کے نام سے مشہور ہے، سمندر کنارے ہونے کی وجہ سے یہ قیمتی اور توجہ کا مرکز ہے۔ میڈیا رپورٹس میں بتایا گیا ہے کہ اداکار جوڑی کا یہ اپارٹمنٹ 39 ویں منزل پر موجود تھا جس کا رقبہ 6830 اسکوائر فٹ ہے جب کہ اس ٹاؤر میں پارکنگ کے لیے 4 مقامات ہیں۔ میڈیا کا بتانا ہےکہ اس اپارٹمنٹ کی فروخت کا سودا 31 جنوری کو 80 کروڑ روپے میں فائنل کیا گیا تھا جب کہ دستاویزات میں بتایا گیا ہے کہ اسٹامپ ڈیوٹی کے طور پر 4.80 کروڑ روپے ادا کیے گئے ہیں۔ اس کے علاوہ اس ٹاور میں بالی وڈ اداکار شاہد کپور اور ان کی اہلیہ میرا راجپوت، ابھیشیک بچن سمیت دیگر اداکار اور بزنس مینز کے اپارٹمنٹ بھی موجود ہیں۔

Source: social media