گردن پر چھری رکھ کر خاتون کے زیورات اور 70ہزار روپئے لوٹ لئے گئے
شہر میں ایک بار پھر 'سافٹ ٹارگٹ' تنہا بزرگ خاتون کےگلے پر چھری رکھ کر زیورات اور تقریباً ۷۰ ہزار روپے لوٹ کر گھر کے 'پرانے ملازم' نے فرار ہونے کی کوشش کی، مزاحمت پر گلے میں بیلٹ ڈال کر اور منہ پر تکیہ دبا کر قتل کی کوشش کی گئی۔
تاہم وہ بزرگ خاتون کسی طرح جان بچ گئیں، لیکن شدید زخمی حالت میں شہر کے ایک نجی ہسپتال میں زیر علاج ہیں۔ یہ سنسنی خیز واقعہ شمالی کلکتہ کے جورا باگان میں پیش آیا۔ اس سلسلے میں پولیس میں تحریری شکایت درج کرائی گئی ہے، اور شکایت کی بنیاد پر کلکتہ پولیس نے تحقیقات شروع کر دی ہیں۔
پولیس کے مطابق، وہ بزرگ خاتون مہارشی دیبیندر روڈ کی ایک بلڈنگ کی پانچویں منزل پر رہائش پذیر تھیں۔ گزشتہ کئی سالوں سے ان کے گھر میں سنجے گھوش نامی ایک شخص ملازمت کرتا تھا، اور وہ اسی عمارت کی گراو¿نڈ فلور پر رہتا تھا۔ طویل عرصے تک کام کرنے کی وجہ سے اس نے مالک کا اعتماد حاصل کر لیا تھا۔
معلوم ہوا ہے کہ ہفتہ کی دوپہر کو وہ نشے کی شدید حالت میں عورت کے فلیٹ میں گھس آیا۔ اعتماد کا فائدہ اٹھاتے ہوئے وہ اندر داخل ہوا اور دروازہ بند کر لیا۔ پہلے تو خاتون کو کچھ سمجھ نہ آیا، ہر روز کی طرح اس نے اس کی خیریت پوچھی، لیکن بات چیت کے دوران اس کا اصل مقصد سامنے آ گیا۔ اچانک وہ باورچی خانے سے چھری لے آیا اور بزرگ خاتون کے گلے پر رکھ دی۔ خاتون جان بچانے کے لیے چیخنے لگیں، تو سنجے نے ٹی وی آن کر کے آواز تیز کر دی تاکہ چیخ باہر نہ جائے۔ الزام ہے کہ اس نے خاتون کو جان سے مارنے کی دھمکی بھی دی۔

جان کے خوف سے خاتون خاموش ہو گئیں، اور اس موقعے کا فائدہ اٹھا کر ملازم نے ان کے گلے سے سونے کا ہار اور کانوں سے سونے کے جھمکے لوٹ لیے، نیز کمر سے چابیوں کا گچھا چھین کر الماری سے ۷۰ ہزار روپے بھی لوٹ لیے۔ اس کے بعد جب وہ باہر فرار ہونے لگا تو خاتون نے شور مچا دیا، جس پر ملازم نے ان کے گلے میں بیلٹ کا پھندا ڈال دیا، جس سے ان کا دم گھٹنے لگا۔ انہوں نے مزاحمت کی تو سنجے نے منہ پر تکیہ دبا دیا۔ خاتون بے ہوش ہونے لگیں، اور اس موقعے پر سنجے لوٹے ہوئے پیسے اور زیورات لے کر باہر سے دروازہ بند کر کے فرار ہو گیا۔ طویل عرصے سے گھر میں رہنے کی وجہ سے کسی کو کوئی شک نہیں ہوا۔

وہ بزرگ خاتون کئی گھنٹے تک تقریباً بے ہوشی کی حالت میں گھر میں پڑی رہیں۔ بعد میں جب دوسروں کی نظر پڑی تو انہیں فوری طور پر مقامی ہسپتال میں داخل کرایا گیا۔ خاندان کے دیگر افراد نے جورا باگان تھانے میں تحریری شکایت درج کرائی۔ زخمی خاتون نے نرسنگ ہوم کے بستر پر لیٹے ہوئے پولیس کو پوری واردات بتائی، جس کی بنیاد پر پولیس نے تفتیش شروع کی۔ ملزم کس راستے سے فرار ہوا، اس کی تصدیق کے لیے علاقے کے سی سی ٹی وی فوٹیج کو جانچا جا رہا ہے۔

Source: Admin