کولکاتا: مغربی بنگال میں اسکول سروس کمیشن کے ذریعے الیون اور ٹوئیلتھ (گیارہویں اور بارہویں) جماعت کے اساتذہ کی بھرتی کے عمل میں او بی سی تحفظ کے تحفظات اور نئی قانونی پیچیدگیوں کے باعث ایک بار پھر غیر یقینی صورتحال پیدا ہو گئی ہے۔ ریاست میں او بی سی کوٹہ 17 فیصد سے گھٹا کر نئے اصولوں کے تحت 7 اور 10 فیصد کرنے کی ازسرنو ترتیب کی وجہ سے انتظامیہ نے فی الحال حتمی تقرری نامے کے اجراء کو روکنے کا فیصلہ کیا ہے۔

عدالت کے فیصلوں اور او بی سی تحفظاتی پالیسی کی نئی قانونی ترتیب کے باعث 2025 کے بھرتی کے عمل پر سوالیہ نشان لگ گیا ہے۔ 17 فیصد کے پرانے تحفظاتی کوٹے کے بجائے نئے 10 اور 7 فیصد کوٹے کی ازسرنو تنظیم اس تاخیر کی بنیادی وجہ ہے۔

انتظامی ذرائع کے مطابق، امیدواروں کی اسکریننگ اور کونسلنگ جیسے ابتدائی مراحل تو جاری رہیں گے، لیکن جب تک قانونی جھیڑا ختم نہیں ہوتا اور ترمیم شدہ روسٹر حتمی شکل نہیں اختیار کر لیتا، کسی بھی امیدوار کو حتمی تقرری نامہ جاری نہیں کیا جائے گا اور نہ ہی پولس ویریفکیشن کا عمل شروع ہوگا۔

' جن امیدواروں کی میریٹ لسٹ اور کونسلنگ کا عمل پہلے ہی مکمل ہو چکا ہے، ان کے لیے بھی فی الحال ’انتظار کرو اور دیکھو‘ کی پالیسی اپنائی گئی ہے۔

ریاست میں بی جے پی کی حکومت بننے کے بعد اساتذہ کی بھرتیوں کو شفاف اور درست طریقہ کار کے مطابق انجام دینے کی یقین دہانی کرائی گئی تھی، تاہم حالیہ او بی سی پیچیدگیوں کی وجہ سے امیدواروں کو حتمی ملازمت کے لیے مزید انتظار کرنا پڑے گا۔