سپریم کورٹ نے مہوا مترا کو تھانہ میں حاضر کو کہا
مذہبی توہین کے مقدمے میں ترنمول کی رکن پارلیمنٹ مہوا مترا کو جسمانی طور پر تھانے میں پیش ہونا ہوگا۔ ان کی ورچوئل پیشی کی درخواست پر جمعہ کو سپریم کورٹ نے غور نہیں کیا۔ آخرکار مہوا کے وکیل کو درخواست واپس لینی پڑی۔ انڈے پھینکنے کے واقعے کا حوالہ دیتے ہوئے مہوا نے تھانے میں ورچوئل پیشی کی درخواست کی تھی۔ لیکن سپریم کورٹ کے ججوں نے آزادی پسندوں کی مثال دی اور واضح کیا کہ کسی رکن پارلیمنٹ کو انڈوں سے نہیں ڈرنا چاہیے۔
مذہبی توہین کے الزام میں مہوا کے خلاف ریاست ندیاکے ہوگلا بیریہ تھانے میں ایف آئی آر درج ہے۔ اس مقدمے میں کرشنا نگر کی رکن پارلیمنٹ کو کولکاتا ہائی کورٹ نے تحفظ فراہم کیا تھا۔ 21 جولائی کو ہائی کورٹ کے جسٹس سَوگت بھٹاچاریہ کے بنچ نے کہا تھا کہ اکتوبر تک مہوا کو پولیس گرفتار نہیں کر سکتی۔ تاہم اس دوران وہ تفتیش میں تعاون کریں گی۔ 14 اگست کو مہوا کو جسمانی طور پر تھانے میں پیش ہونے کا بھی کہا گیا تھا۔ ہائی کورٹ کے اس حکم کو چیلنج کرتے ہوئے مہوا سپریم کورٹ گئیں، لیکن عدالت نے ان کی درخواست مسترد کر دی۔
سپریم کورٹ کے جسٹس دیپانکر دتا اور جسٹس شیل ناگور کے بنچ میں مہوا کے وکیل گوپال شنکر نارائن نے استدلال کیا کہ ان کی موکل کو تھانے میں پیش ہونے میں کوئی اعتراض نہیں، لیکن یہ ورچوئل میڈیم سے بھی ہو سکتا ہے۔ تب جسٹس دتا نے زبانی مشاہدہ کرتے ہوئے کہا: "کیوں؟ کیا وہ رکن پارلیمنٹ ہیں؟" اس کے بعد مہوا کے وکیل نے انڈے پھینکنے کا معاملہ اٹھایا اور بتایا کہ کل اس علاقے میں ان کی موکل کو نشانہ بنا کر انڈے پھینکے گئے، مختلف طریقوں سے انہیں ہراساں کیا گیا۔ وکیل نے خدشہ ظاہر کیا کہ تھانے میں پیش ہونے پر دوبارہ وہی صورتحال اور افراتفری پیدا ہو سکتی ہے۔ اس کے بعد عدالت نے آزادی پسندوں کی جدوجہد کی مثال دی۔
جسٹس دتا نے کہا: "جب سیاست میں اترے ہیں تو انڈوں سے کیوں ڈرتے ہیں؟ ہمارے آزادی پسندوں نے تو سینے پر گولیاں کھائی تھیں۔" سپریم کورٹ کا خیال ہے کہ رکن پارلیمنٹ کو انڈے پھینکنے جیسے معمولی واقعے سے نہیں ڈرنا چاہیے۔ اس کے بعد مہواکے وکیل نے مقدمہ واپس لینے کی درخواست کی، جسے ججوں نے اجازت دے دی۔ یعنی مذہبی توہین کے مقدمے میں کولکاتا ہائی کورٹ کا حکم برقرار رہے گا۔ مہوا کو 14 اگست کو جسمانی طور پر ندیاکے تھانے میں پیش ہونا ہوگا اور تفتیش میں تعاون کرنا ہوگا۔
یکم جولائی کو نادیہ میں مہوا کو احتجاج کا سامنا کرنا پڑا تھا۔ اس دن انہیں نشانہ بنا کر انڈے، پتھر پھینکے گئے تھے۔ اس وقت برقعہ پہننے پر مہوا کے بعض تبصروں پر تنازعہ پیدا ہوا تھا، جس پر تھانے میں شکایت درج ہوئی۔ ہائی کورٹ سے تحفظ پایا ہے کالی گھاٹ کے قریبی ترنمول رکن پارلیمنٹ نے۔ واضح رہے کہ ریاست میں بی جے پی کے اقتدار میں آنے کے بعد ممتا بنرجی کے قریبی ترنمول رہنماو¿ں کو نشانہ بنا کر کئی بار انڈے پھینکے گئے ہیں۔ ابھیشیک بندوپادھیائے سے لے کر ک±نال گھوش تک، بہت سے لوگ اس قسم کے حملوں کا شکار ہوئے ہیں۔ بی جے پی کے ریاستی صدر شمک بھٹاچاریہ نے عوامی سطح پر انڈے پھینکنے کی مخالفت کی ہے اور کہا ہے کہ یہ مغربی بنگال کی ثقافت نہیں اور بی جے پی کارکنان انڈے نہیں پھینکتے۔ بی جے پی کی طرف سے اسے 'عوام کا غصہ' کہا جا رہا ہے۔ جبکہ متاثرہ ترنمول قیادت کا دعویٰ ہے کہ عوام کے غصے کے نام پر سیاسی انتقام کو سڑکوں پر انڈے پھینک کر پورا کیا جا رہا ہے۔

Source: Admin