بیئر پلا کر چودہ سالہ لڑکی کی عصمت دری
دو ملزمان کو گرفتار کر لیا گیا ہے، جبکہ متاثرہ 14 سالہ لڑکی اب بھی اسپتال میں زیر علاج ہے۔ یہ واقعہ بھارت کی ریاست مغربی بنگال کے ضلع شمالی 24 پرگنہ کے علاقے ہابرا میں پیش آیا، جہاں متاثرہ لڑکی اپنے ماموں کے گھر مہمانی پر آئی تھی۔یہ واقعہ گزشتہ ہفتے ہفتہ (12 ستمبر) کی شام کو ہابرا میونسپلٹی کے علاقے میں پیش آیا۔ متاثرہ 14 سالہ لڑکی اپنے ماموں کے گھر مہمانی پر آئی تھی۔
: ایک 12 سالہ پڑوسی لڑکی نے متاثرہ لڑکی کو "باہر سیر کے لیے چلنے" کے بہانے بلایا۔ راستے میں دونوں کی ملاقات دو نوجوانوں سے ہوئی جنہیں وہ پہلے سے جانتی تھیں۔ دونوں مرد انہیں ایک جگہ لے گئے اور انہیں نشہ آور مادہ ملا ہوا بیئر پلایا۔ پولیس کے مطابق، 12 سالہ لڑکی نے بتایا کہ بے ہوش ہونے سے پہلے اسے گھر جانے کو کہا گیا اور وہ چلی گئی۔ جبکہ 14 سالہ متاثرہ لڑکی کو دونوں مرد مقامی شیو مندر کے قریب ایک ویران جگہ پر لے گئے، جہاں مبینہ طور پر اس کے ساتھ زیادتی کی گئی۔ متاثرہ لڑکی کے مقررہ وقت پر واپس نہ آنے پر اس کے گھر والوں نے اسی رات ہابرا تھانے میں گمشدگی کی رپورٹ درج کرائی۔ پولیس نے بعد میں اس کے ساتھ گئی 12 سالہ لڑکی سے پوچھ گچھ کی اور اس سے ملے سراغ کی بنیاد پر متاثرہ لڑکی کو تلاش کر لیا۔ اس وقت وہ بے ہوش اور حالت نازک میں تھی، جسے فوری طور پر ہابرا اسٹیٹ جنرل اسپتال منتقل کیا گیا، جہاں وہ اب بھی زیر علاج ہے۔
گرفتار دونوں مردوں کی عمریں 23 سے 24 سال کے درمیان ہیں اور دونوں شادی شدہ ہیں۔ مقامی ذرائع کے مطابق، دونوں کے گھریلو ناچاقی کی وجہ سے ان کی بیویاں سسرال چھوڑ کر جا چکی ہیں۔ پولیس نے یہ بھی بتایا کہ ان میں سے ایک کے خلاف ماضی میں خواتین کے ساتھ بدسلوکی کا الزام بھی تھا۔پولس نے اتوار (13 ستمبر) کی رات دونوں ملزمان کو گرفتار کر لیا۔ ان سے تفتیش جاری ہے اور انہیں عدالت میں پیش کرنے کی تیاری کی جا رہی ہے۔