پارک اسٹریٹ میں لوگوںکی بھیڑ اکٹھا کرنے کےلئے درگا پوجا کے لئے متعدد پروگراموں کا اہتمام
شیو ہی تخلیق ہیں۔ شیو ہی پرلے ہیں۔ اسی لیے پارک اسٹریٹ میں پہلی بار ہونے والی درگا پوجا کے تھیم کے طور پر کولکاتا سناتنی سنگھ نے مہادیو کی لیلا کو منتخب کیا ہے۔ دیوادیدیو کی رودر شکل سے لے کر پاروتی کے لیے ان کی محبت تک، ہر پہلو کو شامل کرتے ہوئے اس بار شنکودیو پانڈا کی پہل پر منعقد ہونے والی پوجا خاصی شاندار ہونے جا رہی ہے۔
پارک اسٹریٹ کا نام سنتے ہی شہر کے لوگوں کی آنکھوں کے سامنے کرسمس اور انگریزی نئے سال کے موقع پر روشنیوں سے جگمگاتی سڑک کا منظر آ جاتا ہے۔ دسمبر میں بھیڑ سے بھری رہنے والی پارک اسٹریٹ شردوتسو کے دوران تقریباً سنسان رہتی ہے۔ لیکن اسی تفریحی سڑک پر اس بار ماں درگا تشریف لا رہی ہیں، وہ بھی پہلی مرتبہ۔ اس کا سہرا کولکاتا سناتنی سنگھ کو جاتا ہے۔
بدھ کے روز بھومی پوجا کے ساتھ ہی زوروشور سے تیاریوں کا آغاز ہوا۔ شنکودیو کے مطابق، ”ہم کھونٹی پوجا پر یقین نہیں رکھتے۔ تمام سناتنی روایات پر عمل کرتے ہوئے بھومی پوجا کے ذریعے ہی درگا پوجا کا آغاز کر رہے ہیں۔“ ڈھاک کی تھاپ اور شنکھ ناد کے ساتھ پوجا کے تھیم سانگ کی لانچنگ کی گئی۔ اس کے بعد شنکودیو نے پوجا کے تھیم کے تصور کے بارے میں بتایا۔ دیگر پوجا کمیٹیوں کو ایک طرح سے چیلنج دیتے ہوئے انہوں نے کہا، ”ہماری درگا پوجا کا تصور اس بار پورے کولکاتا کو حیران کر دے گا۔ منڈپ میں شیو کا تانڈو اور لَے دکھائی دے گی۔ کوئی دوسری پوجا ہمارا مقابلہ نہیں کر سکے گی۔“
پران کے مطابق، راجا دکش کو داماد کے طور پر شیو پسند نہیں تھے۔ لیکن والد کی مرضی کے خلاف ستی نے شیو سے شادی کی۔ ایک مرتبہ دکش نے ایک عظیم یَگیا کا اہتمام کیا، لیکن اس میں شیو اور ستی کو مدعو نہیں کیا۔ اس کے باوجود ستی بغیر دعوت کے یَگیا میں پہنچ گئیں۔ ناراض دکش نے مہادیو کی سخت توہین کی۔ شوہر کی توہین برداشت نہ کر پانے پر ستی نے یَگیا کی آگ میں اپنی جان قربان کر دی۔
بیوی کی موت پر غم اور غصے سے بے قابو شیو نے ستی کا جسم اپنے کندھے پر اٹھا کر تانڈو رقص شروع کر دیا۔ نٹ راج کی شکل میں ان کے تانڈو رقص نے سمندر سے ہمالیہ تک پوری دنیا کو ہلا کر رکھ دیا تھا۔ کہا جاتا ہے کہ اسی رقص کے ذریعے کائنات کی تخلیق، بقا اور تباہی کے چکر کا انتظام ہوتا ہے۔ اسی لیے تانڈو جہاں شدت اور پرلے کی علامت ہے، وہیں تخلیق کی خوشی کا اظہار بھی ہے۔
فنکار سبرت بندیوپادھیائے کے مطابق، ”لَے کا مطلب جیسے پرلے اور تباہی ہے، ویسے ہی اس کا مطلب تال اور آہنگ بھی ہے۔ اور ان دونوں کے ہی علامت شیو ہیں۔ اسی لیے منڈپ میں مہادیو کی دونوں شکلیں نمایاں ہوں گی۔ جہاں ناظرین کو تانڈو دکھائی دے گا، وہیں وہ شیو اور پاروتی کی شادی کے بھی گواہ بنیں گے۔“