غزہ کی پٹی سے فلسطینیوں کی جبری ہجرت سے متعلق امریکی صدر کے متنازع بیان کے بعد غزہ کی پٹی کی ایک فلسطینی بچی نے ڈونلڈ ٹرمپ سے سوال کیا ہے کہ "اگر میں آپ سے کہوں کہ اپنے گھر سے نکل جائیں تو کیا آپ نکل جائیں گے؟" انسٹاگرام پر ایک وڈیو کلپ میں اپنے پیغام میں 'ماریہ حنون' نے مزید پوچھا کہ "اگر آپ اپنے گھر سے نکلنے کو مسترد کر دیں گے تو پھر آپ مجھے سے کیوں چاہتے ہیں کہ میں اپنے گھر اور وطن سے نکل جانا قبول کر لوں"۔ ماریہ کا کہنا تھا کہ "آپ کہتے ہیں کہ آپ لوگ آزادی اور جمہوریت والی ریاست ہیں ... آپ کون سی آزادی کی بات کرتے ہیں؟" پیغام کے اختتام پر فلسطینی بچی نے ٹرمپ کو نصیحت کی "آپ پوری دنیا پر حکم چلاتے ہیں سوائے غزہ کے کیوں کہ غزہ خود پوری دنیا ہے"۔ امریکی صدر ڈونلڈ ٹرمپ اب تک کم از کم چار مرتبہ فلسطینیوں کی غزہ کی پٹی سے ہجرت پر زور دے چکے ہیں۔ انھوں نے اردن اور مصر سے ایک بار پھر مطالبہ کیا ہے کہ وہ فلسطینیوں کا استقبال کریں۔ منگل کی شام ٹرمپ کا کہنا تھا کہ فلسطینیوں کے پاس اس کے سوا کوئی متبادل نہیں ہے کہ وہ غزہ کی پٹی کی تعمیر نو کے عرصے میں اس ساحلی پٹی سے کوچ کر جائیں۔ اسرائیل اور حماس کے درمیان 16 ماہ تک جاری رہنے والی جنگ کے نتیجے میں غزہ کی پٹی میں وسیع پیمانے پر تباہی پھیل چکی ہے۔ البتہ اس مرتبہ ٹرمپ نے باور کرایا ہے کہ وہ فلسطینیوں کی دوبارہ آباد کاری کو مستتقل طور پر سپورٹ کریں گے۔ اس بار ٹرمپ اپنی سابقہ تجاویز سے بھی تجاوز کر گئے جن کو تمام عرب ممالک پہلے ہی سختی سے مسترد کر چکے ہیں۔ واضح رہے کہ غزہ کی آبادی کی جبری ہجرت بین الاقوامی قانون کی خلاف ورزی ہے۔ اس تجویز کو نہ صرف خطے میں بلکہ واشنگٹن کے مغربی اتحادیوں کی جانب سے بھی شدید مخالفت کا سامنا ہے.

Source: social Media