نینی تال، 10 جون: اتراکھنڈ کی ادھم سنگھ نگر پولیس نے نام نہاد مایاوی بابا کو گرفتار کیا ہے جس پر تنتر منتر اور توہم پرستی کے ذریعے معصوم خواتین کا جنسی استحصال کرنے کا الزام ہے۔ سینئر سپرنٹنڈنٹ آف پولیس (ایس ایس پی) منیکانت مشرا نے منگل کے روز اس معاملے کا انکشاف کرتے ہوئے کہا کہ 8 جون کو رودر پور کے بگواڑا علاقے میں ایک خاتون کا اس کے گھر میں گڑھے خزانہ کا لالچ دیکر جنسی استحصال اور لاکھوں روپے کی دھوکہ دہی کا معاملہ سامنے آیا تھا۔ متاثرہ نے اس معاملے میں رودر پور پولیس کو شکایت دی اور الزام لگایا کہ رام پور کے رہنے والے رامبھگت نے جو خود کو مایاوی بابا کہتا ہے، اس کی عصمت دری کی اور اس دوران اس کا قابل اعتراض ویڈیو بھی بنالیا۔ ملزم نے ویڈیو وائرل کرنے کے بہانے اس سے پانچ لاکھ روپے بھی ہڑپ لیے۔ اس کے باوجود ملزم نے متاثرہ کو ہراساں کرنا شروع کر دیا اور اس سے 20 لاکھ روپے کا مطالبہ کرنا شروع کر دیا۔ متاثرہ کی شکایت پر پولیس نے معاملہ درج کر کے ملزم کی گرفتاری کے لیے پولیس ٹیم تشکیل دی۔ ملزم کو پولیس نے کل رات رام پور روڈ پر ڈگری کالج کے قریب سے گرفتار کرلیا ۔ مسٹر مینا نے کہا کہ ملزم کو پولیس کی کارروائی کی بھنک پڑ گئی تھی اور وہ ممبئی فرار ہونے کی فراق میں تھا۔ مسٹر مینا نے مزید کہا کہ ملزم تنتر منتر، توہم پرستی اور سموہن کے ذریعے معصوم اور بے اولاد خواتین کا شکار کرتا تھا۔ ملزم انہیں مختلف طریقوں سے پھنسا کر ان کا جنسی استحصال کرتا تھا۔ مسٹر مینا کے مطابق ملزم پہلے بھی کئی خواتین کو شکار بنا چکا ہے اور جیل بھی جا چکا ہے۔ پولیس نے ملزم کے خلاف مزید کارروائی شروع کر دی ہے۔

Source: uni urdu news service