بلڈ بینک پر حکومت کی نظر، کلکتہ ہائی کورٹ میں مقدمہ درج
ریاست کے محکمہ صحت نے حال ہی میں محلے محلے میں رضاکارانہ خون کے عطیہ کے کیمپ لگا کر خون جمع کرنے سے 11 نجی بلڈ بینکوں کو روکنے کا حکم دیا ہے۔ خون جمع کرنے اور تقسیم میں بے ضابطگیوں کے الزام میں یکم اگست سے نافذ اس ہدایت نامے کو چیلنج کرتے ہوئے اب ایک متعلقہ نجی بلڈ بینک نے کلکتہ ہائی کورٹ کا رخ کیا ہے۔
ریاستی محکمہ صحت کی بلڈ ٹرانسفیوڑن کونسل کی جانب سے جاری کردہ ہدایت نامے میں بتایا گیا تھا کہ حال ہی میں مختلف نجی بلڈ بینکوں میں اچانک چھاپے مارنے پر متعدد بے ضابطگیاں صحت حکام کی نظر میں آئی ہیں۔ اس کے پیش نظر تحقیقات شروع کی گئی ہیں۔ ہدایت نامے میں کہا گیا کہ اس تحقیقات کے ختم ہونے تک متعلقہ 11 نجی بلڈ بینکوں کے لیے رضاکارانہ خون کے عطیہ کے کیمپ لگا کر خون جمع کرنے پر پابندی نافذ رہے گی۔ درخواست کے پیش نظر ہائی کورٹ نے جمعہ کو حکومت سے پوچھا کہ تحقیقات کس مرحلے میں ہے۔ جسٹس کرشنا راو¿ نے 14 اگست تک رپورٹ طلب کی ہے۔ مقدمے کی اگلی سماعت 19 اگست کو ہوگی۔
محکمہ صحت کے ذرائع کے مطابق، مقررہ ہدف سے کہیں زیادہ خون جمع کرنا، خون کے عطیہ کے کیمپ میں قوانین کی خلاف ورزی، بغیر کسی اجازت کے سرخ خون کے خلیات اور پلازما دوسری ریاستوں میں بیچ کر کاروبار کرنا سمیت متعدد الزامات کے تحت ان 11 بلڈ بینکوں کے خلاف تحقیقات جاری ہیں۔ یکم اگست سے باہر کیمپ (خون کا عطیہ کیمپ) لگا کر خون جمع کرنا ان کے لیے بند کر دیا گیا ہے۔ تاہم ہدایت نامے میں کہا گیا ہے کہ یہ بلڈ بینک اپنے ہسپتال یا ادارے کے اندر تربیت یافتہ عملے کی مدد سے سرکاری قوانین کے مطابق خون جمع کر سکیں گے۔ اس فہرست میں سونار پور، اینٹالی، جودھ پور پارک، علی پور روڈ، پدم پوکور، بیلے گھاٹا، ہاوڑہ، کرشنا نگر، رائے گنج، مشرقی بردھمان اور اونڈال کے نجی بلڈ بینک شامل ہیں۔

Source: Admin