سمندری طوفان ’ارنب‘ کی شدت میں اضافہ! رات ہی رخ بدل کر آندھرا کے ساحل کی طرف بڑھے گا، کئی ٹرینیں منسوخ، اوڈیشہ میں اسکول بند
خلیج بنگال میں بننے والا سمندری طوفان ’ارنب‘ مسلسل شدت اختیار کر رہا ہے۔ سیٹلائٹ تصاویر کے تجزیے کے بعد محکمۂ موسمیات نے بتایا ہے کہ اگلے 12 گھنٹوں میں یہ شدید سے انتہائی شدید طوفان کی شکل اختیار کر سکتا ہے۔ صبح ساڑھے پانچ بجے کی رپورٹ کے مطابق، طوفان آندھرا پردیش کے وشاکھاپٹنم سے 260 کلومیٹر جنوب اور جنوب مشرق میں، جبکہ اوڈیشہ کے گوپال پور سے 380 کلومیٹر جنوب میں موجود ہے۔

ماہرینِ موسمیات کا خیال ہے کہ اب یہ طوفان مغرب اور شمال مغرب کی جانب بڑھے گا۔ منگل کی رات یہ اپنا رخ کچھ بدل کر شمال مغرب کی طرف آگے بڑھے گا۔ بدھ کی صبح آندھرا پردیش اور پڈوچیری کے یانم ساحلی علاقے میں باپٹلا اور وشاکھاپٹنم کے درمیان کسی مقام سے ’ارنب‘ خشکی سے ٹکرائے گا۔

ساحل سے ٹکراتے وقت آندھرا پردیش کے ساحلی علاقوں میں ہوا کی رفتار 115 سے 125 کلومیٹر فی گھنٹہ تک پہنچ سکتی ہے۔ تیز ہواؤں کی زیادہ سے زیادہ رفتار 140 کلومیٹر فی گھنٹہ ہونے کا امکان ہے۔