یوم آزادی کے موقع پر وزیر اعلیٰ شوبھندو ریڈیو پرپیغام دیں گے
ریاست کے نئے وزیر اعلیٰ اور ریاستی حکومت کے فیصلے کے تحت اس سال یوم آزادی کے موقع پر مغربی بنگال میں متعدد نئے اقدامات کے اشارے ملے ہیں۔ یوم آزادی کے موقع پر ملک کی صدر دروپدی مرمو روایتی طور پر دوردرشن اور آکاشوانی کے ذریعے قوم سے خطاب کریں گی۔ اس بار اسی دن آکاشوانی کلکتہ سے ریاست کے نو منتخب وزیر اعلیٰ شوبھیندو ادھیکاری بھی ریاستی عوام سے ریڈیو پیغام دیں گے۔ پروٹوکول کے مطابق صدر کے خطاب کے بعد ہی وزیر اعلیٰ کا یہ خطاب نشر کیا جا سکتا ہے۔ تاہم پرسار بھارتی یا آکاشوانی کی طرف سے ابھی تک خطاب کے مخصوص وقت یا کس بینڈ پر نشر کیا جائے گا، اس بارے میں کوئی اطلاع نہیں دی گئی ہے۔ وزیر اعلیٰ نے خود اپنے ریڈیو خطاب کے معاملے کی تصدیق کی ہے۔
صرف وزیر اعلیٰ کا ریڈیو پیغام ہی نہیں، بلکہ 80 ویں یوم آزادی کے موقع پر وزیر اعظم نریندر مودی کے 'ہر گھر ترنگا، گھر گھر ترنگا' پروگرام میں بھی پہلی بار مغربی بنگال شامل ہوا ہے۔ اس موقع پر ریاست بھر میں متعدد رنگا رنگ پروگراموں کا اہتمام کیا گیا ہے۔ سابقہ ترنمول حکومت نے اس مرکزی پروگرام میں ریاست کو شامل نہیں کیا تھا، جیسا کہ سرکاری حلقوں کا دعویٰ ہے۔ اس لیے اس بار یوم آزادی کی تقریبات کے انداز اور پروگراموں کے لحاظ سے اسے خاص اہمیت کا حامل سمجھا جا رہا ہے۔
یوم آزادی کے موقع پر وزیر اعلیٰ کا ریڈیو خطاب مغربی بنگال میں بے مثال۔ جیوتی باسو، بدھ دیب بھٹاچاریہ یا ممتا بنرجی — ان میں سے کسی نے بھی وزیر اعلیٰ کے دور میں یوم آزادی کے موقع پر ریاستی عوام سے اس قسم کا خطاب نہیں دیا۔ تاہم اس سے قبل مختلف مواقع پر وزرائے اعلیٰ کے ریڈیو پیغامات کی مثالیں موجود ہیں۔ سدھارتھ شنکر رائے نے ریاست کی ترقی سے متعلق مختلف معاملات پر ماہانہ ریڈیو پیغام دیا ہے۔ پروفل چندر سین نے بھی ریاستی صورتحال پر مختلف مسائل پر ریڈیو کے ذریعے ریاستی عوام کو پیغام دیا ہے۔ بیدھان چندر رائے سمیت متعدد وزرائے اعلیٰ نے سیکنڈری اور ہائر سیکنڈری امتحانات سے قبل طلبائ و طالبات کو ریڈیو پیغام دیا ہے۔ اس لحاظ سے دیکھا جائے تو تقریباً 50 سال بعد مغربی بنگال کا کوئی وزیر اعلیٰ ریاستی عوام کو ریڈیو پیغام دے رہا ہے۔

Source: Admin