کولکاتا: نیو مارکیٹ کی مرزا غالب اسٹریٹ میں واقع ایک کثیر منزلہ عمارت میں لگنے والی آگ نے کئی سوالات کھڑے کر دیے ہیں۔ اس عمارت کی تقریباً ہر منزل پر الگ الگ ہوٹل یا گیسٹ ہاؤس قائم ہیں، جہاں 8 بائی 8 کے انتہائی تنگ اور گھپچی کمرے بنائے گئے ہیں۔ منگل کی دیر رات عمارت کی تیسری منزل پر واقع ایک ہوٹل میں اچانک آگ بھڑک اٹھی۔ اگرچہ آگ کا پھیلاؤ زیادہ شدید نہیں تھا، لیکن دیکھتے ہی دیکھتے زہریلے دھوئیں نے پوری عمارت کو اپنی لپیٹ میں لے لیا، جس کے باعث 1 بچہ، 2 خواتین اور 6 مردوں سمیت 9 افراد کی دردناک موت ہو گئی۔
حادثے کا شکار ہونے والے ہوٹل میں اندر آنے اور باہر جانے کا محض ایک ہی تنگ راستہ تھا۔ ہنگامی صورتحال کے لیے کوئی ایمرجنسی ایگزٹ موجود نہیں تھا۔ دھوئیں کے شدید طوفان میں مقیمین کو باہر نکلنے کا راستہ سمجھ نہیں آ رہا تھا۔ اپنی جان بچانے کے لیے کچھ لوگ باتھ روم میں گھس گئے اور وہاں کی کھڑکیاں توڑ کر باہر نکلنے کی کوشش کرنے گے۔

مقیمین کا الزام ہے کہ حادثے کے بعد ہوٹل انتظامیہ کا کوئی بھی شخص مدد کے لیے آگے نہیں آیا۔ اگر فائر بریگیڈ کے اہلکار بروقت نہ پہنچتے تو شاید مزید لوگ اپنی جانوں سے ہاتھ دھو بیٹھتے۔
اس عمارت میں زیادہ تر دیگر ریاستوں اور بنگلہ دیش سے آئے وہ لوگ ٹھہرے ہوئے تھے جو کولکاتا علاج کروانے آئے تھے۔ رامپورہاٹ سے آئے ہوئے اعجاز احمد نامی ایک شخص نے بتایا کہ وہ چوتھی منزل کے ایک گیسٹ ہاؤس میں ٹھہرے ہوئے تھے۔ رات تقریباً سوا دو بجے دو خواتین کی دل دہلا دینے والی چیخوں سے ان کی آنکھ کھلی۔ جیسے ہی انہوں نے کمرے کا دروازہ کھولا، زہریلا دھواں اندر بھر گیا۔ گیلری اتنی تنگ تھی کہ دھوئیں میں کچھ بھی نظر نہیں آ رہا تھا۔

عمارت کی سب سے اوپری منزل پر رہنے والے ایک مقامی خاندان نے بتایا کہ انہوں نے ہوٹل انتظامیہ سے بارہا فائر سیفٹی کے انتظامات کرنے کی اپیل کی تھی، لیکن کسی نے کوئی بات نہیں سنی۔ انتظامیہ کو شکایتیں کرنے کے باوجود کوئی اقدام نہیں کیا گیا۔
بی جے پی رہنما سنتوش پاٹھک نے موقع پر پہنچ کر احتجاج کیا اور الزام لگایا کہ یہ بنیادی طور پر ایک رہائشی عمارت تھی، جسے غیر قانونی طور پر تجارتی ہوٹلوں میں تبدیل کر دیا گیا۔ انہوں نے الزام عائد کیا کہ ہوٹلوں کے کمرے بڑھانے کے لیے عمارت کے اہم پلرز تک کاٹ دیے گئے تھے، جس سے پوری عمارت ساخت کے اعتبار سے انتہائی کمزور ہو چکی ہے۔

Source: Admin