برطانوی شہزادہ ہیری اور ان کی اہلیہ میگھن مارکل کے خیراتی ادارے نے فلسطین کی حمایت کرنے پر تبصرے مسلم گروپ سے تعلقات منقطع کر دیے۔ آرچ ویل فاؤنڈیشن جسے ہیری اور میگھن نے 2020ء میں قائم کیا تھا اس ادارے نے 2023ء سے اب تک ملواکی مسلم ویمنز کولیشن کو تقریباً 55 ہزار 700 ڈالرز کی 2 گرانٹس دی ہیں۔ ایک امریکی نشریاتی ادارے نے حال ہی میں آرچ ویل فاؤنڈیشن کو خط لکھ کر ایم ایم ڈبلیو سی کے فلسطینی نژاد امریکی بانی جانان نجیب کے فلسطین کے حامی بیانات سے آگاہ کیا۔ بعد ازاں آرچ ویل فاؤنڈیشن نے اعلان کیا کہ فاؤنڈیشن ایم ایم ڈبلیو سی کے بانی جانان نجیب کے فلسطین کی حمایت کے بارے میں معلوم ہونے کے بعد اب اس تنظیم کو عطیات دینا بند کر دے گی۔ یہاں اس بات کا ذکر کرنا اہم ہے کہ جانان نجیب نے پچھلے سال اپنی ایک بلاگ پوسٹ میں لکھا تھا کہ فلسطین پر اسرائیل کا 75 سالہ قبضہ اور غزہ میں نسل کشی ایک سنگین ناانصافی ہے۔ اُن کی پوسٹ کے آخر میں فلسطین کی آزادی کے لیے لگایا جانے والا مقبول نعرہ’From the river to the sea, Palestine will be free‘ بھی شامل تھا۔

Source: Social Media