محبت کا المناک انجام! شادی کے 3سال بعد کلیانی میں خاتون کی پراسرار موت محبت کے بعد شادی۔ شادی کے3 سال کے اندر خاتون کی پراسرار موت! شوہر اور سسرال والوں کے خلاف قتل کا الزام۔ مقتولہ کے والدین کا دعویٰ ہے کہ جہیز کے مطالبے پر پیٹ کر قتل کیا گیا۔ دوسری طرف سسرال والوں کا کہنا ہے کہ گھریلو خاتون نے خودکشی کی ہے۔ یہ واقعہ کل یانی کے ہرین گھاٹا میں پیش آیا۔ پولیس نے معاملے کی تحقیقات شروع کر دی ہیں۔ پولیس اور خاندانی ذرائع کے مطابق، مقتولہ خاتون کا نام برشتی پاڑوئی ہے۔ وہ ہرین گھاٹا میونسپلٹی کے وارڈ نمبر ۱۳ کے دھیگھا پاڑہ شیو مندر علاقے کی رہائشی تھیں۔ ان کا ایک مقامی نوجوان سوجیت بھومک سے محبت کا تعلق تھا اور اسی سے شادی ہوئی۔ الزام ہے کہ شادی کے بعد سے شوہر اور اس کے خاندان والے برشتی کو میکے سے پیسے لانے کے لیے دباو¿ ڈالتے تھے۔ ملزم سوجیت شرابی حالت میں برشتی کو مارا پیٹا کرتا تھا۔ یہاں تک کہ انہیں رشتہ داروں سے بات کرنے کی اجازت نہیں دی جاتی تھی۔ بیٹی پر تشدد کی خبر ملنے پر برشتی کے والد کرشنا پاڑوئی انہیں گھر لے جانے آئے، تو الزام ہے کہ نوجوان نے انہیں بھی مارا پیٹا۔ جھگڑے کے بعد وہ واپس چلے گئے۔ آج جمعہ کی صبح برشتی کے خاندان والوں کو معلوم ہوا کہ ان کی بیٹی ہرین گھاٹا دیہی ہسپتال میں داخل ہے۔ وہاں جا کر پتہ چلا کہ برشتی انتقال کر چکی ہیں اور لاش ہسپتال میں پڑی ہے۔ میکے والوں کا دعویٰ ہے کہ وہاں خاتون کا شوہر اور سسرال کا کوئی فرد موجود نہیں تھا۔ سسرال کا کہنا ہے کہ برشتی نے پھندا لگا کر خودکشی کی ہے، جبکہ مقتولہ کے خاندان کا الزام ہے کہ اسے مار پیٹ کر قتل کیا گیا۔ خاندان والوں نے تھانے میں شکایت درج کرائی ہے۔ مقتولہ کے ایک بھائی نے کہا، ''لڑکا کوئی کام نہیں کرتا۔ بہن کو میکے سے پیسے لانے کے لیے دباو¿ ڈالا جاتا تھا۔ پڑوسیوں سے پتہ چلا کہ اس پر اکثر ظلم کیا جاتا تھا۔ ہم سخت سزا چاہتے ہیں۔'' مقتولہ کے والد کرشنا پاڑوئی نے کہا، ''بیٹی کو مار کر گھر میں لٹا دیا گیا تھا۔ ایک دن پہلے مجھے بھی مارا پیٹا گیا۔ داماد کو سخت سزا ملنی چاہیے۔'' شکایت ملنے کے بعد پولیس نے برشتی کے شوہر سوجیت بھومک کو حراست میں لے لیا ہے۔ لاش کو پوسٹ مارٹم کے لیے بھیج کر پولیس نے تحقیقات شروع کر دی ہیں۔ پولیس کا کہنا ہے کہ ابتدائی رپورٹ آنے کے بعد ہی موت کی اصل وجہ معلوم ہو سکے گی۔ اس واقعے سے علاقے میں شدید ہلچل مچ گئی ہے۔

Source: Admin