انڈیا نے امریکی مصنوعات پر ٹیرف صفر کرنے کی پیشکش کی، لیکن اب دیر ہوچکی ہے: ٹرمپ

واشنگٹن، یکم ستمبر: امریکی صدر ڈونالڈ ٹرمپ نے پیر کو دعویٰ کیا کہ ہندستان نے امریکی مصنوعات پر درآمداتی محصول کو 'نہ ہونے کے برابر' کرنے کی پیشکش کی ہے ، لیکن اب بہت دیر ہو چکی ہے ۔ پیر کو اپنے سوشل میڈیا پلیٹ فارم ٹروتھ سوشل پر ایک پوسٹ میں مسٹر ٹرمپ نے لکھا کہ ہندستان نے طویل عرصے سے امریکی مصنوعات پر دنیا میں سب سے زیادہ ٹیکس عائد کیا ہے اور اس کی وجہ سے دونوں ممالک کے درمیان یک طرفہ تجارت ہوئی ہے ۔ انہوں نے اسے “یک طرفہ تباہی” قرار دیا۔ امریکی صدر نے لکھا، "انہوں نے (ہندستان) اب درآمداتی ڈیوٹی کو نہ ہونے کے برابر کرنے کی پیشکش کی ہے ، لیکن اب بہت دیر ہوچکی ہے ۔ انہیں ایسا بہت پہلے کر لینا چاہیے تھا،" ۔ قابل ذکر ہے کہ امریکہ نے یکم اگست سے ہندستانی اشیا پر درآمدی ڈیوٹی بڑھا کر 25 فیصد کر دی تھی جسے 27 اگست کو دوگنا کرکے 50 فیصد کر دیا گیا تھا۔امریکہ کے اس اقدام کے بعد دونوں ممالک کے تعلقات میں تلخی آ گئی ہے ۔ مسٹر ٹرمپ نے کہا کہ بہت کم لوگ سمجھتے ہیں کہ امریکہ ہندستان کے ساتھ بہت کم تجارت کرتا ہے جبکہ ہندستان امریکہ کے ساتھ بہت زیادہ تجارت کرتا ہے ۔ اس کی وضاحت کرتے ہوئے انہوں نے لکھا کہ امریکہ ہندوستان کا سب سے بڑا گراہک ہے اور ہندستان اسے بڑی مقدار میں سامان فروخت کرتا ہے جبکہ وہ امریکہ سے بہت کم خریدتا ہے ۔ انہوں نے ہندستان میں امریکی مصنوعات پر اعلیٰ درآمداتی محصولات کو اس کی وجہ بتاتے ہوئے کہا"یہ مکمل طور پر یک طرفہ تباہی تھی،" ۔ امریکی صدر نے روس سے تیل خریدنے پر ایک بار پھر ہندستان کو تنقید کا نشانہ بنایا۔ انہوں نے کہا، " ہندستان زیادہ تر خام تیل اور فوجی مصنوعات روس سے خریدتا ہے ، ہم سے اس کی خریداری بہت کم ہے ۔" قابل ذکر ہے کہ مسٹر ٹرمپ نے 27 اگست سے ہندستانی مصنوعات پر عائد 25 فیصد درآمدی ڈیوٹی کو روس سے خام تیل اور فوجی ساز و سامان کی خریداری جاری رکھنے پر تعزیری کارروائی قرار دیا ہے ۔ ان کا استدلال ہے کہ ہندستان کا یہ قدم یوکرین میں روس کے اقدامات کی مدد کر رہا ہے ۔

Source: uni news