ویابلا اسٹیشن پر ریلوے پٹری میں دراڑ، سیالدہ-ہاسن آباد برانچ پر ٹرینوں کی آمدورفت بند
صبح سویرے سیالدہ-ہاسن آباد برانچ کے ویابلا اسٹیشن پر ریلوے پٹری میں بڑی دراڑ پڑ گئی۔ اس کے نتیجے میں صبح سے ہی اس برانچ پر ٹرینوں کی آمدورفت بند ہے۔ مسافروں کو شدید پریشانیوں کا سامنا کرنا پڑ رہا ہے۔ جنگی پیمانے پر ریلوے پٹری کی مرمت کا کام جاری ہے۔ ویابلا سمیت اس برانچ کے تمام اسٹیشنوں پر مسافر ٹرینوں کے انتظار میں کھڑے ہیں۔ معلوم ہوا ہے کہ اپ اور ڈاو¿ن دونوں لائنوں پر ٹرینوں کی آمدورفت روک دی گئی ہے۔
اطلاعات کے مطابق، صبح 7 بج کر 10 منٹ پر ایک ٹرین اسٹیشن سے گزری۔ اسی دوران ایک شخص نے غیر معمولی آواز سنی۔ ٹرین کے دو ڈبے گزرنے کے فوراً بعد یہ واقعہ پیش آیا۔ قریب جا کر دیکھنے پر اسے ریلوے پٹری میں دراڑ نظر آئی۔ معاملے کی سنگینی کو سمجھتے ہوئے فوری طور پر ریلوے محکمہ کو اطلاع دی گئی۔
اطلاع ملتے ہی ریلوے کے ملازمین، انجینئرز اور جی آر پی کے اہلکار فوراً موقع پر پہنچ گئے۔ مسافروں کی حفاظت کے پیش نظر ٹرینوں کی آمدورفت روک کر جنگی پیمانے پر پٹری کی دراڑ کی مرمت کا کام شروع کر دیا گیا۔ اس واقعے کے باعث صبح سے ہی سیالدہ-ہاسن آباد برانچ پر ٹرینوں کی آمدورفت متاثر ہے۔ مصروف اوقات میں ملازمت اور دیگر کاموں کے سلسلے میں سفر کرنے والے متعدد افراد کو مشکلات کا سامنا کرنا پڑا۔
مقامی لوگوں کو خدشہ ہے کہ اگر وقت رہتے ریلوے پٹری کی دراڑ کا پتہ نہ چلتا تو مسافر ٹرین کسی بڑے حادثے کا شکار ہو سکتی تھی۔ تاہم، پٹری میں دراڑ پڑنے کی اصل وجہ ابھی واضح نہیں ہو سکی ہے۔ ریلوے حکام مرمت کا کام مکمل کرکے جلد از جلد ٹرینوں کی آمدورفت معمول پر لانے کی کوشش کر رہے ہیں۔
ویابلا اسٹیشن پر ریلوے پٹری میں دراڑ، سیالدہ-ہاسن آباد برانچ پر ٹرینوں کی آمدورفت بند...
Source: Admin
