بدایوں میں ماں بیٹی کا گلا کاٹ کر قتل

بدایوں، 15 اگست : اترپردیش میں بدایوں ضلع کے داتا گنج کوتوالی حلقہ میں جمعرات اور جمعہ کی درمیانی شب میں ماں اور بیٹی کا گلا کاٹ کر قتل کر دیا گیا، خبر کے مطابق اس واردات میں ایک شخص چاقو لگنے کی وجہ سے زخمی بھی ہوا ہے۔ پولیس ذرائع نے بتایا کہ75 سالہ شانتی دیوی اور ان کی بیوہ بیٹی 42 سالہ جینتی ،داتا گنج کوتوالی علاقے کے بیرم پور گاؤں میں ایک نئے تعمیر شدہ مکان میں سو رہی تھیں، شانتی کی بہن کا بیٹا وپن بھی ان کے ساتھ رہتا ہے، جو واردات کے وقت گھر کے باہر ایک چارپائی پر سو رہا تھا۔ لواحقین نے پولیس کو بتایا ہے کہ گزشتہ رات 2 بجے کے قریب نامعلوم شخص نے ماں اور بیوہ بیٹی کا گلا کاٹ کر قتل کر دیا۔ گھر کے باہر سوئے ہوئے وپن نامی نوجوان پر بھی چاقو سے حملہ کیا گیا، اس کا کہنا ہے کہ شور سن کر اس نے دروازہ کھولا تو اندر سے ایک نقاب پوش شخص باہر آیا اور اس پر چاقو سے حملہ کر دیا۔ متوفی کے بھائی سنجو نے بتایا کہ وپن نے آکر اطلاع دی کہ خالہ اور بہن کو نامعلوم شخص نے گلا کاٹ کر قتل کردیا۔ اہل خانہ کا کہنا ہے کہ ان کی بیوہ بہن کو سسرال سے کچھ زمین ملی تھی، جسے اس نے حال ہی میں 50 لاکھ روپے میں فروخت کیا تھا۔ واقعہ کی اطلاع ملتے ہی سینئر سپرنٹنڈنٹ آف پولیس برجیش کمار سنگھ موقع پر پہنچے اور واردات کی مختصر معلومات حاصل کی، پولیس نے معاملے کی تفتیش شروع کر دی ہے۔

Source: uni urdu news service