نڈا کے قافلے پر ’حملہ‘، 6 سال بعد ترنمول کانگریس کے 2 رہنما گرفتار
جے پی نڈا کے قافلے پر حملے کو تقریباً 6 سال گزر چکے ہیں۔ اب اس معاملے میں پولیس نے ترنمول کانگریس کے دو رہنماو¿ں کو گرفتار کیا ہے۔ گرفتار افراد کے نام ریپن شیخ اور سنجیب منڈل ہیں۔ دونوں کو جنوبی 24 پرگنہ کے مگرا ہاٹ مغرب علاقے سے گرفتار کیا گیا۔ ان کے قبضے سے آتشیں اسلحہ بھی ضبط کیا گیا ہے۔
پولیس ذرائع کے مطابق، گرفتار ریپن اور سنجیب علاقے میں ترنمول کانگریس کے رہنماو¿ں کے طور پر جانے جاتے ہیں۔ معلوم ہوا ہے کہ دونوں مختلف سماج دشمن سرگرمیوں میں ملوث رہتے تھے۔ اس کے علاوہ ان دونوں پر علاقے میں موٹر سائیکل سواروں کے گروہ کے ذریعے دہشت پھیلانے کا بھی الزام ہے۔ پولیس کے مطابق نڈا کے قافلے پر حملے کے واقعے میں بھی ان کے ملوث ہونے کی اطلاع ہے۔ تاہم اس معاملے میں ان کا اصل کردار کیا تھا، یہ ابھی واضح نہیں ہے۔ تفتیش کار اس بات کی بھی جانچ کر رہے ہیں کہ ان کے پاس سے برآمد ہونے والا آتشیں اسلحہ انہیں کہاں سے ملا۔ پولیس یہ جاننے کی بھی کوشش کر رہی ہے کہ اس واقعے میں کوئی اور بھی ملوث تھا یا نہیں۔
واضح رہے کہ سال 2020 میں جنوبی 24 پرگنہ ضلع میں ایک سیاسی پروگرام میں شرکت کے لیے جاتے وقت شیراکول کے قریب نڈا کے قافلے پر حملہ ہوا تھا۔ اس وقت ان کے ساتھ ریاستی بی جے پی کے دو سابق صدور دلیپ گھوش اور سکانت مجمدار بھی موجود تھے۔ حملے کی شدت کے بارے میں دلیپ گھوش نے کہا تھا کہ اگر بلٹ پروف گاڑی نہ ہوتی تو اس دن موت بھی واقع ہو سکتی تھی۔
اس معاملے کی پہلی ایف آئی آر میں جہانگیر کا نام شامل تھا۔ بعد میں پولیس ذرائع کے مطابق، تفتیش کاروں کے سست رویہ اختیار کرنے کی وجہ سے ملزمان کے خلاف سخت کارروائی نہیں کی جا سکی۔ اسی طرح سزا سے بچ نکلنے کے بعد ’پشپا‘ جہانگیر نے دوبارہ اپنا اثر و رسوخ دکھانا شروع کر دیا۔ اسمبلی انتخابات کے بعد اقتدار کی تبدیلی کے دوران جہانگیر کو گرفتار کیا گیا۔ اس کے خلاف پرانے مقدمے کی بھی دوبارہ تفتیش شروع کی گئی ہے۔اسی مقدمے میں مزید دو افراد کو گرفتار کیا گیا ہے۔ اب دیکھنا یہ ہے کہ اس معاملے میں مزید کن لوگوں کے نام سامنے آتے ہیں۔