Kolkata

پرسنل بینک اکاؤنٹ منجمد کیے جانے کا معاملہ: ابھشیک بندوپادھیائے نے کولکتہ ہائی کورٹ کا رخ کیا

17/08/26

کولکتہ:ترنمول کانگریس کے قومی جنرل سکریٹری اور رکن پارلیمان ابھشیک بندوپادھیائے نے اپنا پرسنل بینک اکاؤنٹ منجمد کیے جانے کے خلاف کولکتہ ہائی کورٹ سے رجوع کیا ہے۔ پیر کے روز ان کے وکیل ایان بھٹاچاریہ نے ہائی کورٹ کے جسٹس کرشنا راؤ کی سنگل بینچ کے سامنے اس معاملے کی فوری سماعت کی استدعا کی۔ عدالت میں ترنمول رہنما کے وکیل نے موقف اختیار کیا کہ ابھشیک بندوپادھیائے کو جلد ہی اپنے علاج کی غرض سے بیرونِ ملک سفر پر جانا ہے، لیکن اس سے پہلے ہی ان کا پرسنل بینک اکاؤنٹ منجمد کر دیا گیا ہے۔ وکیل کا دعویٰ ہے کہ بینک کی جانب سے اس کارروائی کی کوئی واضح وجہ یا اطلاع فراہم نہیں کی گئی ہے۔

ابھشیک کے وکیل نے بھارتیہ ناگرک سرکشا سنہیتا کی دفعہ ۱۰۷ کے استعمال پر سوال اٹھایا۔ انہوں نے عدالت کو بتایا کہ اس قانون کے تحت پولیس کو کسی بھی اکاؤنٹ کو منجمد کرنے سے قبل متعلقہ مجسٹریٹ سے باقاعدہ اجازت یا درخواست دینی ہوتی ہے، لیکن اس کیس میں ایسا کوئی قانونی طریقہ کار نہیں اپنایا گیا۔
جسٹس کرشنا راؤ نے وکیل کے دلائل سننے کے بعد کیس دائر کرنے کی اجازت دے دی۔ سماعت کے دوران جب جج نے پوچھا کہ کیا ابھشیک کے خلاف کوئی تفتیش چل رہی ہے، تو ان کے وکیل نے بتایا کہ ان کے موکل عدالت کی ہدایات کے مطابق تمام تحقیقات میں مکمل تعاون کر رہے ہیں اور اس بینک اکاؤنٹ کو منجمد کیے جانے کا تفتیش سے کوئی تعلق نہیں ہے۔
عدالت نے عرضی گزار کو ہدایت دی ہے کہ وہ اس کیس سے متعلق دیگر فریقین (بینک و انتظامیہ) کو فوری نوٹس جاری کریں۔ معاملے کی اگلی سماعت بدھ کے روز مقرر کی گئی ہے۔

Source: Admin