کلکتہ 28مارچ: سی بی آئی نے جمعہ کو کلکتہ ہائی کورٹ میں کہا ہے کہ آر جی کار میڈیکل کالج و اسپتال کی متاثرہ ڈاکٹر کے ساتھ اجتماعی عصمت دری نہیں ہوئی تھی۔کلکتہ ہائی کورٹ کے جسٹس تیرتھنکر گھوش کے سوال پر سی بی آئی کے وکیل نے کہاکہ ہم اسٹیٹس رپورٹ لے کر آئے ہیں، مزید تفتیش جاری ہے، رپورٹ میں تمام سوالات کا جواب دیا گیا ہے۔ جسٹس گھوش نے سی بی آئی کے وکیل سے دوبارہ پوچھا کہ کیا مرکزی جانچ ایجنسی نے مشتبہ افراد کی فہرست بنائی ہے؟سی بی آئی کے وکیل نے جواب دیاکہ تمام فرانزک رپورٹس لے لی گئی ہیں، جائے وقوعہ سے جمع کیے گئے تمام ڈی این اے کے نمونوں کی جانچ کی گئی۔ گائنی، آرتھوپیڈکس، ڈی این اے ماہرین کے ملک بھر کے مختلف طبی اداروں کے 14 ماہرین پر مشتمل ایک میڈیکل بورڈ تشکیل دیا گیا۔ انہوں نے رائے دی کہ یہ گینگ ریپ کا معاملہ نہیں ہے۔ سی بی آئی کے وکیل نے ہائی کورٹ کو مطلع کیا کہ ایجنسی اب کسی بھی ”بڑی سازش“ اور شواہد کو تباہ کرنے کی تحقیقات کر رہی ہے، جس کے لیے روزانہ تفتیش کی جا رہی ہے۔جسٹس گھوش نے سی بی آئی کے وکیل سے پوچھاکہ ''آپ شواہد کو تباہ کرنے کی تحقیقات کر رہے ہیں، کیا یہ جانچ سازش کے جرم سے متعلق ہے؟'' جب جسٹس گھوش نے پوچھا کہ سی بی آئی نے اجتماعی عصمت دری سے متعلق بھارتیہ نیا سنہتا کی دفعہ 70 کو کیسے چھوڑ دیا، سی بی آئی کے وکیل نے جواب دیا کہ ایجنسی جرم کے بعد کے طرز عمل کی جانچ کر رہی ہے۔ جسٹس گھوش نے کہاکہ لہذا، آپ کہتے ہیں کہ یہ واقعہ ایک ہی شخص نے انجام دیا تھا، یہاں تک کہ اگر کوئی دوسرا مجرم نہیں تھا، تو اس اہم جرم پر کوئی سازش نہیں تھی،'' ریاستی وکیل کلیان بنرجی نے کہا کہ ریاست کو ثبوتوں کو تباہ کرنے کی تحقیقات پر کوئی اعتراض نہیں ہے۔ سیرامپور سے ممبرپارلیمنٹ سینئر وکیل کلیان بنرجی نے کہاکہ ''ثبوتوں کو تباہ کرنے کی تحقیقات کے بارے میں مجھے کوئی اعتراض نہیں ہے۔ لیکن، تفتیش مکمل ہوئی اور چارج شیٹ داخل کر دی گئی۔ اس لیے مزید تفتیش نہیں ہو سکتی۔بنرجی نے دلیل دی کہ مزید تفتیش ٹرائل کے مرحلے پر کی جا سکتی ہے نہ کہ ٹرائل کے اختتام کے بعد۔ ایک ٹرائل کورٹ نے کلکتہ پولیس کے سیوک اہلکار سنجے رائے کو عصمت دری اور قتل کا مجرم قرار دیتے ہوئے عمر قید کی سزا سنائی تھی۔ سی بی آئی نے نچلی عدالت کے فیصلے کے خلاف اپیل کی ہے۔ بنرجی نے کہاکہ ''اگر تفتیش ناقص ہے، تو اس عدالت کے پاس التوا کے دوران اختیار ہے، نمٹانے کے بعد نہیں۔ وہ کب تک تحقیقات کرتے رہیں گے؟ اگر وہ مکمل نہیں کر سکتے تو یہ ان کی ذمہ داری ہے۔ سی بی آئی سالوں سے مقدمے کی سماعت مکمل نہیں کر رہی ہے، بہتر ہے کہ اسے کسی کانسٹیبل کو دے دیا جائیے۔ جسٹس گھوش نے سی بی آئی کو ہدایت دی ہے کہ وہ روزانہ کی بنیاد پر ایجنسی کے ذریعہ پوچھ گچھ کرنے والے لوگوں کی فہرست کے ساتھ کولکاتہ پولیس کے حوالے کی گئی کیس ڈائری کے ساتھ پیش کرے جس نے ابتدائی طور پر عصمت دری اور قتل کی تحقیقات کی تھی۔ جسٹس گھوش نے کہا، ''میں اس بات کا اندازہ لگانا چاہتا ہوں کہ یہ اتنا وقت کیوں لے رہا ہے؟ آپ اس وقت کیوں اور کہاں پھنسے ہوئے ہیں؟۔سی بی آئی کے وکیل نے کہا کہ اس کیس کی تفتیش کب تک مکمل کی جائے گی اس کی کوئی آخری تاریخ نہیں بتاسکی۔ سی بی آئی نے آر جی کار میڈیکل کالج عصمت دری اور قتل کیس میں عدالت میں تین صفحات کی 'اسٹیٹس رپورٹ' پیش کی۔ سی بی آئی کے ذرائع کے مطابق ان کے پاس تین افراد کے فون کی 'کال ڈیٹیلز' ان کی نگرانی میں موجود ہیں۔ دیگر کئی افراد کے بیانات قلمبند کیے گئے ہیں۔ رپورٹ میں جو کچھ بتایا گیا ہے۔ متاثرہ کے والد نے کہا کہ سی بی آئی تازہ تحقیقات کر رہی ہے اور ثبوت جمعہ کو عدالت میں جمع کرائے گئے ہیں۔ تاہم وہ تحقیقات کے نتائج کو مزید تیزی سے جاننا چاہتے ہیں۔ تاہم جج نے انہیں صبر کا مشورہ دیا۔ سی بی آئی نے آر جی کارکیس کی تحقیقات کے دوران اسپتال کے کچھ حصوں کے سی سی ٹی وی فوٹیج کی جانچ کی۔ کئی لوگوں سے پہلے ہی پوچھ گچھ کی جا چکی ہے۔ اس بار چند اور لوگوں سے پوچھ گچھ کی گئی ہے۔ ذرائع کے مطابق سی بی آئی نے رپورٹ میں یہی دعویٰ کیا ہے۔ ذرائع نے یہ بھی بتایا کہ رپورٹ میں افسران نے بتایا کہ اب 24 نئے لوگوں کے بیانات قلمبند کیے گئے ہیں۔ اسپتال کے کچھ دیگر علاقوں کی سی سی ٹی وی فوٹیج اکٹھی کرکے جانچ کی جارہی ہے۔ رپورٹ میں کہا گیا ہے کہ تین نئے لوگوں کی کال ڈیٹیل دیکھی جا رہی ہیں۔ سی بی آئی نے جمعہ کو کہا کہ اگر اسے آر جی کار کیس میں پھنسے اس کے سابق پرنسپل سندیپ گھوش اور تلہ پولیس اسٹیشن کے سابق او سی ابھیجیت منڈل کے خلاف نئے ثبوت ملتے ہیں تو عدالت میں نئے ثبوت پیش کیے جائیں گے۔ متاثرہ خاندان کے وکیل کا کہنا تھا کہ تفتیش زیادہ دیر تک نہیں چلے گی۔ گرفتار سندیپ اور ابھیجیت کو عدالت میں حاضر ہونے کے لیے کہا گیا تھا لیکن وہ حاضر نہیں ہوئے۔ متاثرہ کے والد نے کہا کہ وہ انتظار کر رہے ہیں۔ آٹھ ماہ سے جو کرنا چاہیے وہ نہیں ہو رہا۔ انہوں نے یہ بھی کہا کہ وہ عدالت کے بھروسے پر ہیں۔ اس کے بعد جج نے انہیں صبر کرنے کی ہدات۔ جج نے متاثرہ کے والد سے کہا کہ آپ اپنے آپ کو مجبورنہ سمجھیں جج نے سی بی آئی کو اگلی 'اسٹیٹس رپورٹ' 28 اپریل کو دینے کی ہدایت دی۔ اس سے پہلے سندیپ اور ابھیجیت کو 16 اپریل کو پیش ہونے کا حکم دیا گیا ہے۔ دونوں کو سی بی آئی نے آر جی کار کیس میں ثبوت کھونے کے معاملے میں گرفتار کیا تھا۔ لیکن سی بی آئی ان کے خلاف چارج شیٹ وقت پر پیش نہیں کر سکی۔ دونوں کو اس کیس میں ضمانت مل گئی تھی۔ ابھیجیت کو جیل سے رہا کر دیا گیا۔ لیکن سندیپ آر جی کار اسپتال کے مالی بدعنوانی کے معاملے میں گرفتار ہونے کے بعد بھی جیل میں ہے۔ ان دونوں کو آر جی کار عصمت دری اور قتل کیس میں 16 اپریل کو عدالت میں پیش ہونے کا حکم دیا گیا ہے۔ متاثرہ کے والد نے جمعہ کو عدالت کے باہر کہا، ''سی بی آئی نے جمعہ کو عدالت میں ثبوت جمع کرائے ہیں کہ اس نے ایک نیا آپریشن شروع کیا ہے، ہم نے کہا ہے کہ تحقیقات ٹھیک ہے، ہم جلد نتائج چاہتے ہیں۔'' متاثرہ کے خاندان نے شروع سے ہی آر جی کارمعاملے میں سی بی آئی کی جانچ پر ناراضگی ظاہر کی تھی۔ سی بی آئی کی طرف سے جاری کی گئی پہلی چارج شیٹ میں سنجے رائے کی شناخت اس معاملے میں واحد ملزم کے طور پر کی گئی تھی۔ چارج شیٹ کے مطابق، مقدمے کی کارروائی آگے بڑھی اور کلکتہ پولیس کے ذریعہ گرفتار شہری رضاکار کو مجرم قرار دیا گیا۔ اسے عمر قید کی سزا سنائی گئی۔ متاثرہ کے اہل خانہ کا دعویٰ ہے کہ اس واقعے میں اکیلا سنجے ملوث نہیں ہے۔ انہوں نے سوال کیا کہ باقی ملزمان کا کیا بنے گا؟ متاثرہ کے خاندان نے عدالت کو بتایا کہ وہ سی بی آئی کی تحقیقات میں پیش رفت سے واقف نہیں ہیں۔ اس کی بنیاد پر سی بی آئی نے فروری میں تحقیقات کی پیش رفت پر اپنی پہلی رپورٹ پیش کی تھی۔ انہوں نے جمعہ کو تین صفحات کی 'اسٹیٹس رپورٹ' پیش کی۔

Source: uni news