ترنمول کونسلر الکا نند ا داس کے گھر پر بدعنوانی روک تھام کمیشن کا چھاپہ
بیلی گھاٹا میں سابق ترنمول کونسلر الکانندا داس کے گھر پر ادارہ جاتی بدعنوانی روک تھام کمیشن (انسٹی ٹیوشنل کرپشن ڈیٹرنس کمیشن) نے چھاپہ مارا ہے۔ کچھ دن قبل انہوں نے کلکتہ کے سابق میئر فیرہاد حکیم کی دو کمپنیوں – نیو علی پور کے دفاتر میں بھی کارروائی کی تھی۔ ریٹائرڈ جسٹس بشواجیت باسو کی سربراہی میں کمیشن اس بار بیلی گھاٹا پہنچا۔
ہفتہ کی شام کو تحقیقاتی کمیشن کی ایک ٹیم الکانندا کے گھر پہنچی۔ وہ کلکتہ میونسپل کارپوریشن کے وارڈ نمبر 34 کی کونسلر تھیں۔ ان کے خلاف آمدن سے زائد جائیداد رکھنے کا الزام ہے۔ اسی جائیداد کی تلاش میں ہفتہ کی یہ کارروائی کی گئی۔ الکانندا کی جائیداد کا ذریعہ کیا ہے، کیا اس کا بدعنوانی سے کوئی تعلق ہے، کیا بدعنوانی کی رقم سے جائیداد خریدی گئی ہے – ان سب کی جانچ پڑتال کی جا رہی ہے۔ نیو علی پور کے ٹالی گنج سرکلر روڈ علاقے میں فیرہاد کی کمپنیوں ‘حکیم پولی میکر’ اور ‘حکیم کیمیکلز’ میں بھی کمیشن کے اہلکار گئے تھے۔ دونوں کمپنیوں کے مالک ریاست کے سابق وزیر ہیں۔ ‘حکیم پولی میکر’ بنیادی طور پر پلاسٹک بنانے والی کمپنی ہے جبکہ ‘حکیم کیمیکلز’ میں کیمیائی اشیاءتیار ہوتی ہیں۔ تحقیقاتی کمیشن یہ جانچنے گیا تھا کہ کیا بدعنوانی کا ان سے کوئی تعلق ہے۔
ترنمول کی حکومت کے دوران ممتا بنرجی کی حکومت کے خلاف مسلسل ادارہ جاتی بدعنوانی کے الزامات لگتے رہے تھے۔ بی جے پی نے مغربی بنگال میں اقتدار آنے کے بعد ان الزامات کی تحقیقات کے لیے ایک نیا کمیشن تشکیل دیا ہے۔ اس کی سربراہی ایک سابق جسٹس کو سونپی گئی ہے۔ حکومت تبدیلی کے بعد ترنمول لیڈروں اور کونسلروں کے خلاف طرح طرح کے الزامات سامنے آئے ہیں۔ پولیس نے بھی بہت سے افراد کے خلاف کارروائی کی ہے۔ کلکتہ میونسپل کارپوریشن کے متعدد کونسلرز اس دوران گرفتار ہو چکے ہیں۔ کلکتہ کے ایلڈرمین بورڈ کو بھی تحلیل کر دیا گیا ہے۔ اب ریاستی تحقیقاتی کمیشن کی نظر الکانندا کی جائیداد پر ہے۔