رینوکا سوامی قتل کیس میں کنڑ اداکار درشن کو بڑا دھچکا، سپریم کورٹ نے ہائی کورٹ کا فیصلہ پلٹ دیا، ضمانت منسوخ

سپریم کورٹ نے کرناٹک ہائی کورٹ کے فیصلے کو پلٹتے ہوئے اداکار درشن تھوگودیپا، پوترا گوڑا اور 5 دیگر ملزمان کی ضمانت منسوخ کر دی اور پولیس کو حکم دیا کہ انہیں فوراً گرفتار کیا جائے۔ جسٹس جے بی پاردیوالا اور جسٹس آر مہادیون کی بنچ نے 24 جولائی کو فیصلہ محفوظ رکھنے کے بعد آج یہ حکم سنایا۔ خبروں کے مطابق اداکارہ پوترا گوڑا کو پولیس نے گرفتار کرلیا ہے۔ عدالت نے جیل حکام کو خبردار کرتے ہوئے کہا کہ جس دن پتہ چلا کہ ملزمان کو پانچ ستارہ سہولت دی جا رہی ہے، پہلا قدم ایس پی اور دیگر افسروں کی معطلی کا ہوگا۔ پولیس کے مطابق جون 2024 میں درشن نے متاثرہ رینوکا سوامی کو تین دنوں تک بنگلورو کے ایک شیڈ میں قید رکھا، اذیتیں دیں اور بعد میں اس کی لاش ایک نالے سے برآمد ہوئی۔ اس واردات میں کئی شریک ملزمان بھی شامل تھے جن پر کارروائی کی گئی۔ کرناٹک ہائی کورٹ نے 6 ملزمان کو ضمانت دی تھی، مگر سپریم کورٹ نے اسے صوابدیدی طاقت کا غلط استعمال قرار دیتے ہوئے منسوخ کر دیا۔ 48 سالہ درشن دو دہائیوں سے کنڑ فلم انڈسٹری میں سرگرم ہیں لیکن تنازعات سے ان کا پرانا تعلق رہا ہے۔ 2011 میں بیوی نے گھریلو تشدد کا مقدمہ درج کرایا۔ ان پر 2021 میں ایک ویٹر کے ساتھ ہاتھاپائی کا الزام لگا اور 2023 میں پالتو کتے کو پڑوسی پر حملہ کرنے کے لیے چھوڑنے کا تنازع بھی سرخیوں میں رہا۔

Source: social media