کلکتہ؛ریاستی حکومت نے دیگر پسماندہ طبقات (او بی سی) ریزرویشن پر ایک سروے کی بنیاد پر او بی سی ریزرویشن کی نئی فہرست تیارکی ہے۔ اس سلسلے میں ریاست کے نوٹیفکیشن کو چیلنج کرتے ہوئے کلکتہ ہائی کورٹ میں ایک بار پھر مقدمہ دائر کیا گیا ہے۔ بدھ کو جسٹس تپوبرتا چکرورتی کی ڈویڑن بنچ میں عدالت کی توجہ اس معاملے کی طرف مبذول کرائی گئی۔ کیس کی سماعت آئندہ پیر کو ہونے کا امکان ہے۔ معلوم ہوا ہے کہ کمیشن کی سفارشات کے مطابق ریاستی حکومت نے 8 مئی کو ایک نیا نوٹیفکیشن جاری کیا۔ 27 مئی کو او بی سی کی فہرست میں 51 زمروں کو شامل کیا گیا اور 3 جون کو مزید 25 زمروں کو شامل کیا گیا۔ اس کے ساتھ ہی ذیلی زمرہ بندی کا عمل شروع ہوا - 35 زمروں کو OBC-A کیٹیگری میں اور 41 زمروں کو OBC-B کیٹیگری میں رکھا گیا۔ مقدمہ میں سوال اٹھائے گئے ہیں کہ اتنے کم وقت میں سروے کیسے ممکن ہے، کیا سروے قواعد کے مطابق ہوا؟ یہ بھی پوچھا گیا ہے کہ کیا یہ سروے کل آبادی کو دیکھتے ہوئے کیا گیا؟ حال ہی میں ایک معاملے میں ہائی کورٹ نے 2010 کے بعد تیار کیے گئے ریاست کے تمام او بی سی سرٹیفکیٹس کو منسوخ کر دیا تھا۔سپریم کورٹ نے بھی ہائی کورٹ کے حکم پر روک نہیں لگائی تھی۔ بعد میں، ریاستی حکومت نے او بی سی ریزرویشن کے لیے دوبارہ سروے شروع کیا، جس کے لیے ہائی کورٹ میں مقدمہ دائر کیا گیا۔ بعد ازاں ریاست نے دوبارہ نوٹیفکیشن جاری کرکے سروے شروع کیا۔

Source: social media