جلسے کے باوجود کولکتہ میں ٹریفک کی صورتحال معمول کے مطابق رہی

جلسے کے باوجود کولکتہ میں ٹریفک کی صورتحال معمول کے مطابق رہی 25 ویساکھ، رابندر جینتی کے دن کولکتہ کے بریگیڈ پریڈ گراونڈ میں مغربی بنگال کی پہلی بی جے پی حکومت کی حلف برداری کی تقریب منعقد ہوئی۔ اس موقع پر پولیس نے بریگیڈ سے ملحقہ کچھ سڑکوں پر ٹریفک کو کنٹرول کیا تھا، تاہم اس کی وجہ سے شہر میں کہیں بھی اضافی ٹریفک جام دیکھنے میں نہیں آیا۔ سڑکوں پر آمد و رفت مجموعی طور پر معمول کے مطابق رہی اور شہریوں کو کسی بڑی پریشانی کا سامنا نہیں کرنا پڑا۔ کولکتہ پولیس نے پہلے ہی نوٹیفکیشن جاری کر دیا تھا جس کے تحت مال بردار گاڑیوں کی آمد و رفت مکمل طور پر بند تھی اور کئی مقامات پر پارکنگ کی ممانعت تھی۔ وزیر اعظم کے دورے کے پیشِ نظر ایسپلانیڈ ریمپ، کے پی روڈ، ہسپتال روڈ، لورز لین، کیسورینا ایونیو اور کوئنز وے پر ٹریفک کو کنٹرول کیا گیا۔شمال سے جنوب یا جنوب سے شمال کی طرف جانے والی گاڑیوں کو بریگیڈ کے بجائے متبادل راستوں پر موڑا گیا۔ ما فلائی اوور اور وکٹوریہ میموریل کی طرف سے آنے والی گاڑیوں کا رخ بھی تبدیل کیا گیا۔ماضی میں جب بھی بریگیڈ میں بڑے سیاسی جلسے ہوئے، شہریوں کو شدید ٹریفک جام کا سامنا کرنا پڑتا تھا۔ تاہم، اس بار ہفتہ کے روز ایسی کوئی صورتحال پیدا نہیں ہوئی۔ ماہرین کا ماننا ہے کہ چونکہ یہ کوئی روایتی سیاسی جلسہ نہیں تھا اور باہر سے گاڑیوں میں بھر کر لوگ نہیں لائے گئے تھے، اس لیے ٹریفک کا انتظام آسان رہا۔ لوگ اپنی مرضی سے بڑی تعداد میں پیدل چل کر میدان تک پہنچے۔بریگیڈ کے اسٹیج پر گورنر آر این روی کی موجودگی میں شبھیندو ادھیکاری نے وزیر اعلیٰ کے عہدے کا حلف اٹھایا۔ ان کے ساتھ پانچ دیگر وزرا نے بھی حلف لیا، جن میں دلیپ گھوش، اگنی مترا پال، خودی رام ٹوڈو، اشوک کیرتنیہ اور نشیت پرامانک شامل ہیں۔اس تاریخی لمحے کے گواہ خود وزیر اعظم نریندر مودی اور مرکزی وزیر داخلہ امت شاہ بنے۔ اسٹیج پر کئی مرکزی وزراءاور بی جے پی کے زیرِ اقتدار ریاستوں کے وزرائ اعلیٰ بھی موجود تھے۔ اس 'ہائی وولٹیج' تقریب کے لیے سکیورٹی کے انتہائی سخت انتظامات کیے گئے تھے اور شہر کے مرکز میں بڑی تعداد میں پولیس اور مرکزی افواج تعینات تھیں۔ جن کے پاس مخصوص شناختی کارڈ تھے انہیں ہی میدان میں داخلے کی اجازت دی گئی، جبکہ باقی عوام نے باہر کھڑے ہو کر حلف برداری کا نظارہ کیا۔

Source: Social Media