ٹی ایم سی سے بغاوت کا بی جے پی نے دیا انعام: سشمیتا دیو، سکھیندو شیکھر اور پرکاش چک برائیک بنے راجیہ سبھا امیدوار

کولکتہ: مغربی بنگال کی سیاست میں ایک بہت بڑی اور ڈرامائی تبدیلی دیکھنے میں آئی ہے۔ ترنمول کانگریس کے تین سابق ارکانِ پارلیمنٹ، جنہوں نے ممتا بنرجی کا ساتھ چھوڑ کر بھارتیہ جنتا پارٹی میں شمولیت اختیار کی تھی، انہیں بی جے پی قیادت کی طرف سے بڑا انعام مل گیا ہے۔ بی جے پی نے راجیہ سبھا کے ضمنی انتخابات کے لیے سشمیتا دیو، سکھیندو شیکھر رائے اور پرکاش چک برائیک کو اپنا امیدوار بنانے کا باضابطہ اعلان کر دیا ہے۔ دلچسپ بات یہ ہے کہ ان تینوں رہنماؤں نے جمعرات کو ہی بی جے پی میں شمولیت اختیار کی اور پارٹی نے محض چند گھنٹوں کے اندر ہی انہیں راجیہ سبھا کا ٹکٹ دے کر ممتا بنرجی کو ایک سخت سیاسی پیغام دیا ہے۔ یاد رہے کہ یہ ضمنی انتخابات انہی تینوں رہنماؤں کے استعفوں کے بعد خالی ہونے والی نشستوں پر ہو رہے ہیں، جن کے لیے الیکشن کمیشن نے 24 جولائی کو ووٹنگ کا اعلان کیا ہے۔ دوسری طرف، بی جے پی نے گجرات کی مانجل پور اسمبلی سیٹ کے ضمنی انتخاب کے لیے ستیش بھائی گووند بھائی پٹیل کو اپنا امیدوار نامزد کیا ہے۔ راجیہ سبھا کے لیے نامزدگی کے فوراً بعد پرکاش چک برائیک نے میڈیا سے گفتگو کرتے ہوئے ریاستی حکومت پر سخت تنقید کی۔ انہوں نے کہا: "مغربی بنگال میں گزشتہ 49 سالوں کے دوران (جس میں 34 سال بائیں بازو کی حکومت اور 15 سال ترنمول کانگریس کا دور شامل ہے) بہت سے ترقیاتی منصوبے ادھورے رہ گئے۔ اس کی بنیادی وجہ ریاستی اور مرکزی حکومت کے درمیان تال میل کا نہ ہونا تھا۔ غریبوں کے لیے 100 دن کی روزگار اسکیم کی فنڈنگ پچھلے پانچ سال سے رکی ہوئی تھی جس سے عوام متاثر ہوئے الٹا نقصان اٹھانا پڑا۔" انہوں نے مزید کہا کہ موجودہ مرکزی بجٹ میں شمالی بنگال کے لیے ایمس ، متعدد میڈیکل کالجز، سلی گوڑی سے دہلی تک بلٹ ٹرین اور ہاسیمارا میں ہوائی اڈے کی تجاویز شامل ہیں۔ ہم صرف ترقی چاہتے ہیں، اور اگر مرکز و ریاست مل کر کام کریں تو ایسے مسائل پیدا ہی نہ ہوں۔ سشمیتا دیو، سکھیندو شیکھر رائے اور پرکاش چک برائیک کے گزشتہ ماہ ٹی ایم سی سے استعفے کے بعد سے ہی سیاسی حلقوں میں قیاس آرائیاں عروج پر تھیں کہ ان کا اگلا قدم کیا ہوگا۔ جمعرات کو ان تمام افواہوں پر اس وقت مہر لگ گئی جب انہوں نے باقاعدہ طور پر کمل کا دامن تھام لیا۔

Source: social media