ٹی ایم سی کو بڑا جھٹکا، اداکارہ کوئل ملک نے بھی راجیہ سبھا سے دیا استعفیٰ

کولکاتہ، 11 جون:ترنمول کانگریس کے اندر جاری سیاسی غیر یقینی صورتحال اور اتھل پتھل کے درمیان مشہور اداکارہ اور لیڈر کوئل ملک نے جمعرات کی روز راجیہ سبھا کی رکنیت سے استعفیٰ دے دیا۔ محترمہ ملک کے اس اقدام سے پہلے راجیہ سبھا کے ارکان سکھیندو شیکھر رائے اور سشمتا دیو بھی ایوانِ بالا سے استعفیٰ دے چکے ہیں۔ وہیں، آج ہی صبح ایک اور ٹی ایم سی ایم پی (رکنِ پارلیمنٹ) پرکاش چِک بڑائک نے نائب صدر جمہوریہ اور راجیہ سبھا کے چیئرمین سی پی رادھاکرشنن کو اپنا باضابطہ استعفیٰ سونپا تھا۔ مسٹر بڑائک کے استعفے کے بعد ایوانِ بالا میں ٹی ایم سی کے ارکان کی تعداد گھٹ کر 10 رہ گئی تھی، جو بعد دوپہر کوئل ملک کے استعفے کے ساتھ ہی اب گر کر محض 9 پر آ گئی ہے ۔ بنگالی فلم انڈسٹری کی بے حد مقبول اداکارہ کوئل ملک کو ٹی ایم سی قیادت نے اسمبلی انتخابات سے ٹھیک پہلے راجیہ سبھا کے لیے نامزد کیا تھا۔ اسے پارٹی کی ایک بڑی تزویراتی (اسٹریٹجک) چال کے طور پر دیکھا گیا تھا۔ ایم پی بننے کے بعد کوئل اپنے والد و معروف اداکار رنجیت ملک اور خاندان کے ساتھ نئی دہلی میں نئی پارلیمنٹ ہا¶س بھی گئی تھیں اور انہوں نے کئی مواقع پر پارٹی کی انتخابی مہم میں سرگرم کردار ادا کیا تھا۔ سیاسی تجزیہ کاروں کا ماننا ہے کہ کوئل ملک کا استعفیٰ ایسے وقت میں آیا ہے جب ٹی ایم سی چاروں طرف سے سیاسی چیلنجوں اور لگاتار لگنے والے جھٹکوں کا سامنا کر رہی ہے ۔ ذرائع کے مطابق اداکارہ گزشتہ کچھ عرصے سے جاری سیاسی تنازعات سے خود کو دور رکھنا چاہتی تھیں اور انہوں نے اس بڑھتی ہوئی سیاسی ہلچل میں الجھنے کے بجائے باوقار طریقے سے عہدہ چھوڑنا بہتر سمجھا۔ اسمبلی انتخابات کے نتائج کے اعلان کے بعد سے ہی ٹی ایم سی کے اندر عدم اطمینان کے سُر ابھرنے لگے تھے ۔ قیاس آرائیاں کی جا رہی ہیں کہ استعفوں کا یہ سلسلہ یہیں نہیں رکنے والا اور آنے والے دنوں میں کچھ اور ارکانِ پارلیمنٹ بھی اسی راہ پر چل سکتے ہیں۔ تاہم، پارٹی نے ابھی تک ان اجتماعی استعفوں پر کوئی سرکاری بیان جاری نہیں کیا ہے ۔ عہدہ چھوڑنے والے بیشتر رہنما¶ں نے بھی ابھی تک اپنے مستقبل کے سیاسی پتے نہیں کھولے ہیں۔ ایم پی کے عہدے کا حلف لیتے وقت ملک و قوم کی خدمت کا عزم دہرانے والی کوئل ملک کا محض چند ماہ کے اندر ہی استعفیٰ دے دینا، قومی سیاست میں ٹی ایم سی کے گھٹتے ہوئے اثر و رسوخ اور پارٹی کے اندر جاری گہرے اندرونی بحران کی طرف صاف اشارہ کر رہا ہے ۔

Source: UNI NEWS