مغربی بنگال سول سروس افسران کی ترقی سے متعلق قوانین میں اہم ترمیم

کولکاتا18فروری :منگل کے روز نبانّہ میں کابینہ کے اجلاس میں منظوری ملنے کے بعد، وزیر اعلیٰ ممتا بنرجی نے پریس کانفرنس میں اس فیصلے کا اعلان کیا تھا۔ بدھ کے روز محکمہ عملہ و انتظامی اصلاحات کی جانب سے نوٹیفکیشن جاری کر کے اس فیصلے کو نافذ کر دیا گیا ہے۔ اس فیصلے کے مطابق، حکومتِ مغربی بنگال نے مغربی بنگال سول سروس (ایگزیکٹو) افسران کی ترقی سے متعلق قوانین میں اہم ترمیم کی ہے۔ محکمہ عملہ و انتظامی اصلاحات کے ڈبلیو بی سی ایس سیل سے جاری کردہ اس نوٹیفکیشن کے مطابق، آئین کے آرٹیکل 309 کے تحت حاصل اختیارات کا استعمال کرتے ہوئے گورنر نے اس ترمیم کی منظوری دی ہے۔ نوٹیفکیشن میں ذکر کیا گیا ہے کہ 8 فروری 2021 کو جاری کردہ 'ویسٹ بنگال سول سروس (ایگزیکٹو) آفیسرز (پے) رولز، 2021' میں یہ تبدیلی کی گئی ہے۔ ترمیم کے مطابق، اگر کوئی ڈبلیو بی سی ایس (ایگزیکٹو) افسر مسلسل پانچ سال تک تسلی بخش طریقے سے کام کرتا ہے، تو اسے ایس ڈی ایم یا ایس ڈی او کے عہدے پر تعیناتی کے لیے زیرِ غور لایا جا سکتا ہے۔ ان پانچ برسوں میں 'پروبیشن پیریڈ' اور بلاک ڈیولپمنٹ آفیسر یا اس کے مساوی عہدے پر کام کرنے کی مدت کو بھی شمار کیا جائے گا۔تاہم، نوٹیفکیشن میں یہ بھی واضح کیا گیا ہے کہ یہ ترقی مکمل طور پر ریاستی حکومت کی ضرورت اور متعلقہ خالی اسامیوں پر منحصر ہوگی۔ یعنی پانچ سال مکمل ہوتے ہی خودکار طریقے سے ایس ڈی ایم یا ایس ڈی او کے عہدے پر تقرری نہیں ملے گی، بلکہ حکومت ضرورت کے مطابق فیصلہ کرے گی۔ حکومتِ مغربی بنگال کے ایڈیشنل چیف سکریٹری نے گورنر کے حکم پر یہ نوٹیفکیشن جاری کیا ہے۔ انتظامی حلقوں کا ماننا ہے کہ اس ترمیم سے نوجوان اور اہل ڈبلیو بی سی ایس افسران کے لیے اعلیٰ ذمہ دارانہ عہدوں پر پہنچنے کی راہ مزید ہموار ہو سکتی ہے۔دوسری طرف، ڈبلیو بی سی ایس افسران کے ایک حلقے کا کہنا ہے کہ یہ ان کا دیرینہ مطالبہ تھا۔ انتخابات سے قبل اس مطالبے کو تسلیم کر کے ریاستی حکومت نے دراصل اس سطح کے افسران کا دل جیتنے کی کوشش کی ہے۔

Source: PC- anandabazar