مغربی ایشیا میں فوجی تنازع کے باعث دبئی، قطر، ایران اور عراق سمیت کئی ممالک کی فضائی حدود بند کر دی گئی تھیں

مغربی ایشیا میں فوجی تنازع کے باعث دبئی، قطر، ایران اور عراق سمیت کئی ممالک کی فضائی حدود بند کر دی گئی تھیں۔ ایران نے امریکہ کے قریبی مغربی ایشیائی ممالک پر میزائل اور ڈرون حملے کیے، جس کے نتیجے میں اس خطے کے اکثر ممالک نے شہری ہوابازی کی خدمات عارضی طور پر معطل کر دی تھیں۔ دبئی میں بھی کئی مقامات پر ایرانی حملوں کے بعد سیکیورٹی وجوہات کی بنا پر پروازیں روک دی گئی تھیں۔ حالیہ کشیدگی کی وجہ سے مغربی ایشیا کے مختلف ممالک کے ساتھ رابطہ منقطع ہو گیا تھا۔ بالاآخر 113 گھنٹے کی بندش کے بعد کولکتہ ایئرپورٹ سے دبئی کے لیے پروازیں دوبارہ شروع ہو گئیں۔ 'فلائی دبئی' نے یہ سروس بحال کی ہے۔ ان کی ایک پرواز FZ 461/462 بدھ کو دبئی سے روانہ ہوئی، جسے رات 12:25 بجے کولکتہ پہنچنا تھا، لیکن تاخیر کے باعث یہ رات 2:40 بجے لینڈ ہوئی۔ اس پرواز میں 130 مسافر سوار تھے۔ دوسری جانب، کولکتہ سے دبئی کے لیے فلائی دبئی کی ایک پرواز بدھ کی رات 1:25 بجے روانہ ہونی تھی، لیکن وہ رات 3:59 بجے روانہ ہوئی، جس میں 55 مسافر موجود تھے۔ واضح رہے کہ کولکتہ سے دبئی کے لیے آخری پرواز 28 فروری کو صبح 9:35 بجے ایمریٹس کی تھی، جس کے بعد سے رابطہ منقطع تھا۔ اب 113 گھنٹے 5 منٹ بعد یہ سروس دوبارہ بحال ہوئی ہے، جبکہ ایئر عربیہ کی کولکتہ-دبئی پرواز فی الحال منسوخ کر دی گئی ہے۔

Source: PC- anandabazar