ہردیب پور کے نجی اسکول کے ہاسٹل میں طالبات کو جنسی طور پر ہراساں کرنے کے معاملے میں پولیس نے مرکزی ملزم کو گرفتار کر لیا ہے۔ ملزم کا نام سپربھات دلوئی ہے۔ اسے اتوار کو گجرات کے احمد آباد سے گرفتار کیا گیا تھا۔ پولیس نے بتایا کہ آج، منگل کو، ملزم کو کولکتہ لایا جائے گا اور عدالت میں پیش کیا جائے گا۔ ابتدائی تفتیش کے بعد پولیس نے کہا کہ سپربھات کی بیوی سپریا اس ہاسٹل کی وارڈن ہے۔ شکایت درج ہونے کے بعد پولیس نے اسے گرفتار کرلیا۔ اس کے علاوہ اسکول کے انگلش ٹیچر وشوناتھ شیل اور شوبھن منڈل نامی ایک تعلیمی کارکن کو اس واقعے میں ملوث ہونے کے الزام میں گرفتار کیا گیا تھا۔عیسائیوں کے زیر انتظام انگلش میڈیم اسکول کا ہاسٹل ہردیب پور تھانے کے قریب ہے۔ مبینہ طور پر، سپربھات نے گزشتہ اگست میں ہاسٹل کے اندر پانچ نابالغ طالبات کو جنسی طور پر ہراساں کیا۔ سپربھات شادی کے بعد سپریا کے ساتھ اسی ہاسٹل میں رہتا تھا۔ 22 اگست کو طلبائنے اپنے والدین کو سارا معاملہ بتایا۔ والد ین نے پولیس میں شکایت درج کرائی۔ پولیس نے تفتیش شروع کی اور ابتدائی طور پر خاتون وارڈن، ایک اسکول ٹیچر اور ایک تعلیمی کارکن کو گرفتار کرلیا، لیکن سپربھات کولکتہ سے فرار ہوگیا۔ تفتیش کاروں نے بتایا کہ سپربھات احمد آباد میں ایک انٹیریئر ڈیزائنر کے طور پر کام کرتا تھا۔ اسے اتوار کو وہاں سے گرفتار کیا گیا تھا۔

Source: Mashriq News service