وکیل کی عدم موجودگی کی وجہ سے میسی معاملے کی سماعت ملتوی

کولکاتا18دسمبر: کولکتہ کے یووا بھارتی کریرانگھن (سالٹ لیک اسٹیڈیم) میں میسی (Messi) کی آمد کے دوران ہونے والی بدنظمی اور افراتفری کے حوالے سے دائر مفادِ عامہ کی عرضیوں (PILs) پر کلکتہ ہائی کورٹ نے سماعت ملتوی کر دی ہے۔ ریاست کے وکیل کلیان بنرجی کی عدم موجودگی کی وجہ سے قائم مقام چیف جسٹس سوئے پال اور جسٹس پارتھ سارتھی سین کے ڈویڑن بنچ نے یہ فیصلہ لیا۔ ریاستی حکومت نے یووا بھارتی میں ہونے والی بدنظمی کی تحقیقات کے لیے ریٹائرڈ جسٹس اسیم کمار رائے کی سربراہی میں ایک خصوصی کمیٹی تشکیل دی ہے۔ وکیل سبیاساچی چٹرجی نے اس کمیٹی کی تشکیل کے فیصلے کو عدالت میں چیلنج کیا ہے۔ اس واقعے سے متعلق کل تین مفادِ عامہ کی عرضیاں دائر کی گئی تھیں، جن کی سماعت جمعرات کو ہونا تھی۔ سماعت کے دوران عدالت کو بتایا گیا کہ ریاست کے سینئر وکیل کلیان بنرجی اس وقت سپریم کورٹ میں ایک دوسرے اہم کیس میں مصروف ہیں، اس لیے انہوں نے سماعت ملتوی کرنے کی درخواست کی۔ ڈویڑن بنچ نے اس درخواست کو قبول کرتے ہوئے تینوں عرضیوں پر سماعت اگلی تاریخ تک کے لیے ٹال دی ہے۔میسی کے پروگرام کے دوران اسٹیڈیم میں سیکیورٹی اور انتظام کی کمی کی وجہ سے ہونے والی بدنظمی پر کئی سوالات اٹھائے گئے تھے، جن کی اب قانونی جانچ کی جا رہی ہے۔

Source: PC- sangbadpratidin