وی ایل ٹی ڈی ریچارج کے مسائل پر محکمہ ٹرانسپورٹ کو میمورنڈم، فٹنس اور پرمٹ کی تجدید نہ روکنے کی اپیل

بسوں، منی بسوں اور ایپ کیبز (اوبر، اولا وغیرہ) میں نصب وہیکل لوکیشن ٹریکنگ ڈیوائس کے ریچارج سے متعلق پیچیدگیوں کو لے کر مشترکہ ٹرانسپورٹ تنظیموں نے ریاستی محکمہ ٹرانسپورٹ سے رجوع کیا ہے۔ پیر کے روز محکمہ ٹرانسپورٹ کے پرنسپل سکریٹری سریندر گپتا کو ایک تفصیلی میمورنڈم (ڈپوٹیشن) سونپا گیا۔ اس میں شکایت کی گئی ہے کہ گزشتہ دو سالوں سے بڑی تعداد میں ٹرانسپورٹ مالکان اور آپریٹرز وی ایل ٹی ڈی سسٹم کو ریچارج کرنے میں شدید مشکلات کا سامنا کر رہے ہیں۔ تنظیموں کا دعویٰ ہے کہ اس کی وجہ سے گاڑیوں کے فٹنس سرٹیفکیٹ اور پرمٹ کی تجدید (رینول) بھی خطرے میں پڑ گئی ہے۔ یہ میمورنڈم 'جوائنٹ فورم آف ٹرانسپورٹ آپریٹرز' کی جانب سے دیا گیا ہے۔ اس پر آل بنگال بس منی بس جنرل ایسوسی ایشن کے جنرل سکریٹری راہول چٹوپادھیائے، آن لائن کیب آپریٹرز گلڈ کے جنرل سکریٹری اندرنیل بنرجی، سٹی سبربن بس سروس کے جنرل سکریٹری ٹیٹو ساہا، نارتھ بنگال پیسنجر ٹرانسپورٹ آپریٹرز کوآرڈینیشن کمیٹی کے جنرل سکریٹری پرنب مانی اور پول کار اونرز ویلفیئر ایسوسی ایشن کے جنرل سکریٹری سدیپ دت نے دستخط کیے ہیں۔

Source: PC-anandabazar