زیرِ تعمیر عمارت میں ہولناک حادثہ، مزدوروں پر دیوار گر گئی

کولکاتا10مارچ :ایک کثیر المنزلہ عمارت کی تعمیر کا کام جاری تھا کہ اچانک ایک اونچی دیوار گر گئی۔ اس کے نتیجے میں 12 سے 15 مزدور کنکریٹ کے نیچے دب گئے۔ اس خوفناک حادثے میں اب تک 7 افراد کی موت کی خبر ہے، جبکہ کم از کم 4 افراد شدید زخمی ہوئے ہیں۔ یہ واقعہ پیر کی رات گروگرام کے سدھراولی علاقے میں واقع 'سگنیچر گلوبل سوسائٹی' نامی ایک رہائشی پروجیکٹ میں پیش آیا۔ پولیس نے تصدیق کی ہے کہ جائے وقوعہ پر 12 سے 15 مزدور موجود تھے۔ حادثے کی اطلاع ملتے ہی مقامی پولیس اور بعد ازاں ریاستی ڈیزاسٹر مینجمنٹ فورس موقع پر پہنچ گئی۔ دیوار کا ملبہ اتنا زیادہ تھا کہ امدادی کارروائیاں تقریباً ایک گھنٹے تک جاری رہیں۔ زخمی مزدوروں کو فوری طور پر اسپتال منتقل کیا گیا، جہاں علاج کے دوران 7 مزدور دم توڑ گئے۔ 4 زخمی مزدور تاحال اسپتال میں زیرِ علاج ہیں۔ ہلاک ہونے والے مزدوروں کے اہل خانہ کا الزام ہے کہ مزدور انتہائی خطرناک حالات میں کام کر رہے تھے۔ ایک رشتہ دار نے شکایت کی کہ حادثے کی خبر ملنے پر جب انہوں نے جائے وقوعہ پر پہنچنے کی کوشش کی تو ٹھیکیدار کمپنی نے انہیں اندر جانے سے روک دیا، یہاں تک کہ انتظامیہ نے ان سے بات کرنا بھی گوارا نہیں کیا۔ دوسری جانب پولیس کا کہنا ہے کہ لاشیں سرکاری اسپتال میں منتقل کر دی گئی ہیں۔ حادثہ کیسے ہوا اور کیا اس میں ٹھیکیدار کمپنی کی غفلت شامل تھی، اس کی تحقیقات کی جا رہی ہیں۔

Source: PC- sangbadpratidin