ترکی کا پاسپورٹ بنوانے کے نام پر شہر میں دو بنگلہ دیشی شہریوں کا اغوا

کولکاتا17فروری :پاسپورٹ اور ویزا بنوانے کے بہانے دو بنگلہ دیشی شہریوں کو اغوا کرنے کا سنگین الزام سامنے آیا ہے۔ اغوا کاروں نے تاوان کے طور پر تین لاکھ روپے وصول کیے، لیکن مبینہ طور پر مزید رقم کا مطالبہ جاری رکھا۔ ٹیکنو سٹی تھانہ پولیس نے کارروائی کرتے ہوئے ایک ہوٹل پر چھاپہ مارا، جہاں سے دونوں مغویوں کو بحال کروا لیا گیا اور دو افراد کو گرفتار کر لیا گیا۔ گرفتار شدگان میں سے ایک بنگلہ دیشی شہری بتایا جاتا ہے۔پولیس اس بات کی تحقیقات کر رہی ہے کہ اغوا کا اصل مقصد کیا تھا اور کیا مغویوں اور گرفتار بنگلہ دیشی شہری کے درمیان پہلے سے کوئی تعلق یا لین دین کا تنازع تھا۔ تفصیلات کے مطابق، چند روز قبل دو بنگلہ دیشی شہری، راجیب لشکر اور جنید میاں، قانونی ویزا پر کولکتہ آئے تھے۔ پولیس ذرائع کا کہنا ہے کہ ان کا منصوبہ ہندوستان سے ترکی جانے کا تھا۔ ویزا کے حصول کے لیے ان کا رابطہ ایک ایجنٹ اچنتیا کمار پال سے ہوا۔ تحقیقات کاروں کا دعویٰ ہے کہ گرفتار بنگلہ دیشی شہری ہمایوں کبیر نے ہی راجیب اور جنید کا تعارف اچنتیا پال سے کروایا تھا۔الزام ہے کہ پاسپورٹ بنوانے کے نام پر ان دونوں کو بلایا گیا اور وہاں انہیں یرغمال بنا لیا گیا۔ اغوا کاروں نے تین لاکھ روپے تاوان مانگا، جو بنگلہ دیش کے ایک بینک سے ان کے اکاونٹ میں منتقل کر دیا گیا۔ تاہم، اس کے بعد بھی مزید رقم کا مطالب کیا گیا۔پولیس حکام کو واقعے کی اطلاع ملتے ہی تحقیقات کا آغاز کر دیا گیا تھا۔ ٹیکنو سٹی تھانہ پولیس نے ہوٹل پر چھاپہ مار کر دونوں شہریوں کو بازیاب کرایا۔ غیر قانونی طور پر قید کرنے اور زبردستی رقم وصول کرنے کے الزام میں ہمایوں کبیر اور اچنتیا پال کو گرفتار کر لیا گیا ہے۔ آج، بروز منگل، دونوں ملزمان کو باراسات عدالت میں پیش کیا جائے گا۔

Source: PC- sangbadpratidin