ترنمول کانگریس نے مغربی بنگال میں اپنی تمام کمیٹیاں تحلیل کر دیں

کولکاتہ، 3 جون : ترنمول کانگریس نے بدھ کے روز مغربی بنگال میں اپنی تمام تنظیمی کمیٹیوں کو تحلیل کرنے کا اعلان کر دیا، جس کے بعد سیاسی حلقوں میں یہ قیاس آرائیاں تیز ہو گئی ہیں کہ پارٹی قیادت اندرونی اختلافات اور ممکنہ تقسیم کو روکنے کی کوشش کر رہی ہے ۔سیاسی مبصرین کا ماننا ہے کہ ترنمول کانگریس کی سربراہ ممتا بنرجی کا یہ فیصلہ پارٹی کی حالیہ انتخابی کارکردگی اور متعدد اراکینِ اسمبلی کے باغیانہ رویے کے بعد طلبہ، نوجوان، مزدور اور خواتین ونگز کی ازسرِ نو تنظیم کے لیے ایک وسیع حکمتِ عملی کا حصہ ہو سکتا ہے ۔ پارٹی کی جانب سے سوشل میڈیا پر جاری ایک بیان میں کہا گیا کہ تفصیلی غور و خوض کے بعد ریاست کی تمام کمیٹیوں کو تحلیل کرنے کا فیصلہ کیا گیا ہے ۔ بیان کے مطابق، تنظیمی ڈھانچے کی ازسرِ نو تشکیل سے قبل ہر سطح پر جامع جائزہ اور تنظیمی کارکردگی کا تفصیلی تجزیہ کیا جائے گا تاکہ پارٹی کو مزید م¶ثر اور مضبوط بنایا جا سکے ۔ یہ اعلان ایسے وقت میں سامنے آیا ہے جب اسی روز ترنمول کانگریس کے باغی اراکینِ اسمبلی نے مغربی بنگال اسمبلی کے اسپیکر رتھن باسو کو ایک خط پیش کرکے معطل شدہ رکنِ اسمبلی رتوبرت بندیوپادھیائے کو قائدِ حزبِ اختلاف کے طور پر تسلیم کرنے کا مطالبہ کیا۔ اس خط پر رتوبرت بندیوپادھیائے کے علاوہ 58 اراکینِ اسمبلی کے دستخط موجود بتائے گئے ہیں۔ خط میں معطل شدہ رکنِ اسمبلی سندیپن ساہا، جاوید خان اور شیولی ساہا کے نام نائب قائدِ حزبِ اختلاف کے لیے تجویز کیے گئے ہیں، جبکہ اخترالزمان کو چیف وہپ مقرر کرنے کی سفارش کی گئی ہے ۔

Source: UNI NEWS