ترنمول نے ایک بار پھر صدر جمہوریہ ہند سے ملاقات کےلئے وقت مانگا

ترنمول کانگریس نے ایک بار پھر صدر جمہوریہ دروپدی مرمو سے ملاقات کے لیے وقت مانگتے ہوئے تیسری بار خط لکھا ہے۔ اس سے قبل دو بار ان کی درخواست مسترد کی جا چکی ہے۔ پیر کے روز بھیجے گئے اس خط میں ترنمول نے 24 مارچ سے 2 اپریل کے درمیان ملاقات کا وقت مانگا ہے تاکہ مغربی بنگال حکومت کی جانب سے قبائلی معاشرے (آدی واسی سماج) کے لیے کیے گئے کاموں کا 'رپورٹ کارڈ' پیش کیا جا سکے۔ وزیر اعلیٰ ممتا بنرجی کی ہدایت پر ڈیریک او برائن اور سدیپ بندوپادھیائے جیسے سینئر لیڈروں کو صدر سے وقت لینے کی ذمہ داری دی گئی تھی۔ اس سے قبل 9 مارچ اور 11 مارچ کو بھی ایسی ہی درخواستیں بھیجی گئی تھیں، لیکن راشٹرپتی بھون کی جانب سے وقت کی کمی کا حوالہ دیتے ہوئے انہیں قبول نہیں کیا گیا تھا۔ اس معاملے کے پس منظر میں حالیہ تنازع بھی شامل ہے۔ 7 مارچ کو صدر جمہوریہ کے دورہ مغربی بنگال کے دوران پروگرام کی جگہ کی تبدیلی اور ہوائی اڈے پر وزیر اعلیٰ یا کسی وزیر کی عدم موجودگی پر صدر نے ناراضگی ظاہر کی تھی۔ بی جے پی اور وزیر اعظم نریندر مودی نے اس معاملے پر ترنمول کانگریس کو سخت تنقید کا نشانہ بناتے ہوئے اسے صدر کی توہین قرار دیا تھا۔ اب ترنمول اپنی حکومت کی کارکردگی کا ڈیٹا براہِ راست صدر کو دے کر ان الزامات کا جواب دینا چاہتی ہے۔

Source: PC- anandabazar