توپسیا میں جاوید خان کے دفتر پر دھاوا، مشتعل ہجوم نے حملہ آوروں کو بھگادیا، مرکزی فورسز نے اتر کر صورتحال کو سنبھالا

مغر بی بنگال میں اقتدار کی تبدیلی کی آنچ آج رات توپسیا پہنچ گئی۔ لیکن سابق وزیر اور سیٹنگ ایم ایل اے جاوید احمد خان کی مداخلت کے بعد صورتحال قابو میں کرلیا گیا۔خبروں کے مطابق توپسیا کے 24 نمبر بس اسٹینڈ کے پاس موجود جاوید خان کے دفتر پر حملہ کی خبر سے ہنگامہ مچ گیا۔اس دوران علاقے کے عوام اکٹھا ہوگئے۔ سینکڑوں لوگ سڑک پر نکل آئے اور حملہ آوروں کا تعاقب کیا، جس سے تو پسیا بس اسٹینڈ کے پاس ای ایم بائی پاس پر ٹکراﺅ کی نوبت پیدا ہوگئی تھی۔ پتھراﺅ ہونے لگا۔ ا س دوران پولس نے ریف اورمرکزی فورسز کو اتار دیا۔ جنہوں نے ہلکی لاٹھی چارج کرکے مشتعل ہجوم کو واپس پیچھے دھکیل دیا۔تقریباً ایک گھنٹہ تک علاقہ میں اتھل پتھل مچ گیا تھا۔ مقامی کونسلر اور جاویدخان کے بیٹے فیض احمد خان بھی پہنچے۔ بھاری فورس نے علاقے کو گھیر لیا۔ اس دوران ای ایم بائی پاس کے دوسری جانب ( ٹنگرا) گریس لنگ لیانگ اسکول کی جانب نئے سرے سے تصادم کی خبر ملنے پر فورس کو اس طرف بھاگتے پایا گیا۔ جس سے رات بھر علاقے میں کشیدگی کا ماحول چھایا ہواہے۔

Source: social media