توپسیا میں موبائل فون کے تنازع پر نوجوان کو پیٹ پیٹ کر ہلاک کر دیا گیا

کولکتہ کے علاقے تپسیا میں موبائل فون کے معمولی تنازع پر ایک نوجوان کو پیٹ پیٹ کر ہلاک کرنے کا لرزہ خیز واقعہ پیش آیا ہے۔ پولیس نے کارروائی کرتے ہوئے ملزم 'دوست' کو گرفتار کر لیا ہے۔ ہلاک ہونے والے نوجوان کی شناخت تارکناتھ سامنتا کے نام سے ہوئی ہے، جو بردھمان کا رہنے والا تھا اور تپسیا ساوتھ روڈ پر ایک دکان میں کام کرتا تھا۔ ملزم توفیق انصاری بازو کی ہی ایک دوسری دکان میں کام کرتا تھا اور دونوں کے درمیان دوستی تھی۔ منگل کی رات گئے دونوں کے درمیان موبائل فون کو لے کر بحث شروع ہوئی، جو دیکھتے ہی دیکھتے ہاتھا پائی میں بدل گئی۔بحث کے دوران توفیق نے تارکناتھ کو بے رحمی سے مارنا پیٹنا شروع کر دیا۔ شدید چوٹوں کی وجہ سے تارکناتھ خون میں لت پت ہو کر سڑک پر گر گیا، جس کے بعد ملزم نے اسے ٹھوکریں بھی ماریں، جس سے وہ بے ہوش ہو گیا۔قریب موجود ایک کثیر المنزلہ عمارت کے سیکیورٹی گارڈز نے تارکناتھ کو اسپتال پہنچایا، جہاں ڈاکٹروں نے اسے مردہ قرار دے دیا۔ پولیس نے سی سی ٹی وی فوٹیج کی مدد سے توفیق کی شناخت کی اور بدھ کے روز اسے بنیہ پوکور کے علاقے سے گرفتار کر لیا۔تپسیا تھانے میں ملزم کے خلاف غیر ارادی قتل کا مقدمہ درج کیا گیا ہے۔ پولیس ملزم سے پوچھ گچھ کر کے واقعے کی مزید تفصیلات جاننے کی کوشش کر رہی ہے۔

Source: PC-sangbadpratidin