ٹی ایم سی: گجراتیوں سے متعلق مہوا کے تبصرے پر تنازعہ، خود ممتا نے معافی مانگ لی۔

کولکتہ: بنگال میں انتخابات کے دوران گجراتیوں کے بارے میں پارٹی ایم پی مہوا موئترا کے تبصرے نے ترنمول کانگریس کو مشکل میں ڈال دیا ہے۔ گجراتی برادری کے بارے میں مہوا کے متنازعہ بیان کی وجہ سے بھوانی پور میں گجراتی کمیونٹی کے لوگ سخت برہم ہیں۔ اسی کے نتیجے میں اب وارڈ نمبر 70 کے ترنمول کونسلر اسیم بوس نے سوشل میڈیا پر اپنی پارٹی کی ایم پی کے بیان کی مذمت کی ہے۔ انہوں نے کہا کہ پارٹی اس طرح کے تبصروں کی توثیق نہیں کرتی۔ اس کے ساتھ ہی انہوں نے وزیر اعلیٰ ممتا بنرجی کا ایک پیغام بھی پڑھ کر سنایا جس میں انہوں نے مہوا کے تبصرے پر معافی مانگی ہے۔ سوشل میڈیا پر اپنی پارٹی کی ایم پی کے تبصرے کی مذمت کرتے ہوئے ترنمول کونسلر اسیم بوس نے گجراتیوں کو پیغام دیا۔ انہوں نے بتایا کہ کرشن نگر کی ایم پی مہوا نے پارٹی کی اجازت کے بغیر یہ تبصرہ کیا تھا۔ انہوں نے ایم پی کے بیان پر معافی مانگی۔ ان کا پیغام گجراتی برادری کے دلوں تک پہنچ سکے، اس لیے انہوں نے ہندی اور انگریزی کے ساتھ ساتھ گجراتی زبان میں بھی ایم پی کے بیان کی مذمت کی۔ مزید برآں ترنمول کونسلر نے کہا کہ گجراتی بھائیوں اور بہنوں سے معافی مانگتے ہوئے خود ممتا بنرجی نے ایک پیغام بھیجا ہے۔ انہوں نے وہ پیغام پڑھ کر سنایا جس میں ممتا نے کہا: ”میں اپنے گجراتی بھائیوں اور بہنوں سے ذاتی طور پر معافی مانگتی ہوں۔ مجھے آپ لوگوں پر فخر ہے۔ متعلقہ ایم پی سے اس بارے میں بات کی گئی ہے۔ ہم اس تبصرے کی منظوری نہیں دیتے۔ میں اس طرح کے غیر ذمہ دارانہ تبصرے کے لیے معافی مانگتی ہوں۔“

Source: PC- tv9bangla