تلجلہ میں عمارت گرائے جانے کے وقت ہنگامے کی پیش نظر پولس اہلکار ٹیر گیس کے ساتھ موجود تھے

توپسیاکے چمڑے کے کارخانے میں آتشزدگی کے بعد بدھ کو کولکتہ میں بلڈوزر چلا۔ وزیر اعلیٰ شویندو ادھیکاری کی ہدایت کے چند گھنٹوں کے اندر ہی جے سی بی اس کارخانے کے سامنے پہنچ گئی۔ پوری عمارت کو گرانے کا کام شروع کر دیا گیا۔ شویندو ادھیکاری نے بتایا کہ یہ عمارت غیر قانونی طور پر تعمیر کی گئی تھی، اس لیے اسے مسمار کر دیا جائے گا۔ اس کے ساتھ ہی انہوں نے شہر کے مختلف حصوں میں اس طرح کی غیر قانونی تعمیرات کی نشاندہی کرنے کی ہدایت بھی دی اور کصبہ، تلجلا، مومن پور، اقبال پور جیسے علاقوں کا خاص طور پر ذکر کیا۔ انہوں نے غیر قانونی تعمیرات کے بجلی اور پانی کے کنکشن کاٹنے کا حکم بھی دیا۔ شویندو نے واضح کیا کہ ان کی حکومت غیر قانونی تعمیرات کے معاملے میں 'زیرو ٹالرنس' کی پالیسی اپنا رہی ہے اور جنہیں محتاط ہونے کی ضرورت ہے، وہ ابھی سے محتاط ہو جائیں۔ توپسیامیں آگ لگنے کے واقعے کے بعد پرگتی میدان فائر اسٹیشن کے انچارج افسر کو معطل کر دیا گیا ہے۔ بدھ کے روز ریاست کے فائر اینڈ ایمرجنسی سروسز کے ڈی جی کی جانب سے جاری کردہ ایک نوٹس میں بتایا گیا کہ فرائض میں غفلت برتنے پر پرگتی میدان فائر اسٹیشن کے اسٹیشن آفیسر اور انچارج گوتم داس کو معطل کیا جا رہا ہے۔ اس نوٹس میں یہ بھی کہا گیا ہے کہ پرگتی میدان فائر اسٹیشن کے تحت نگرانی، معائنہ اور فائر سیفٹی قوانین کے نفاذ میں سنگین غفلت پائی گئی۔ فائر حکام کی جانب سے گوتم کو فوری طور پر معطل کر کے محکمانہ تحقیقات شروع کرنے کی ہدایت دی گئی ہے، جسے ایک ماہ کے اندر مکمل کرنا ہوگا۔ معطلی کے دوران گوتم فائر سروس کے ہیڈ کوارٹر میں رہیں گے اور حکام کی اجازت کے بغیر ہیڈ کوارٹر نہیں چھوڑ سکیں گے۔ منگل کی دوپہر توپسیاکے 50/1 جی جے خان روڈ پر واقع ایک کثیر المنزلہ عمارت کی دوسری منزل پر چمڑے کے کارخانے میں آگ لگ گئی تھی۔ آگ تیزی سے پھیل گئی جس میں وہاں کام کرنے والے پانچ چھ افراد پھنس گئے۔ مقامی لوگوں نے آگ دیکھتے ہی فائر بریگیڈ کو اطلاع دی۔ ذرائع کے مطابق، منگل کی دوپہر پونے دو بجے کے قریب فائر بریگیڈ کو اطلاع دی گئی تھی۔ اطلاع ملتے ہی فائر بریگیڈ کی کئی گاڑیاں موقع پر پہنچیں۔ آگ کی شدت کی وجہ سے پھنسے ہوئے افراد کو باہر نکلنے میں دشواری کا سامنا کرنا پڑا۔ فائر فائٹرز نے انہیں نکالنے کی کوشش کی لیکن آگ تیز ہونے کی وجہ سے انہیں کافی مشقت کرنی پڑی۔ بعد ازاں تمام افراد کو جھلسی ہوئی حالت میں نکال کر کلکتہ نیشنل میڈیکل کالج بھیجا گیا، جہاں ڈاکٹروں نے دو افراد کو مردہ قرار دے دیا، جبکہ تین افراد کی حالت تشویشناک ہے اور ان کا علاج جاری ہے۔

Source: PC-sangbadpratidin