تمام اسکولوں میں 'وندے ماترم' لازمی، 'مسخ شدہ تاریخ بدلنے کا یہی صحیح وقت ہے'، شمیک کا بیان

ریاست کے تمام اسکولوں میں بنکم چندر چٹوپادھیائے کا تحریر کردہ قومی گیت 'وندے ماترم' لازمی قرار دیا جا رہا ہے۔ اسکول شروع ہونے کے وقت طلبائ کو یہ گیت گانا ہوگا۔ اس سلسلے میں محکمہ تعلیم کے حکام نے اضلاع کے پرائمری اسکول اساتذہ کے واٹس ایپ گروپس میں ایک پیغام فارورڈ کیا ہے، جس میں اسکول کے آغاز سے قبل وندے ماترم گانا لازمی قرار دینے کی بات کہی گئی ہے۔ اس کے بعد مختلف اضلاع کے اسکولوں میں تیاریاں شروع کر دی گئی ہیں۔ اس حوالے سے وزیر اعلیٰ شویندو ادھیکاری نے واضح کیا ہے کہ آئندہ پیر سے ریاست کے تمام سرکاری اسکولوں میں دعائیہ گیت کے طور پر 'وندے ماترم' کا آغاز ہو رہا ہے اور اس بارے میں نوانّہ (سیکریٹریٹ) جا کر مطلع کیا جائے گا۔ بی جے پی کے ریاستی صدر شمیک بھٹاچاریہ نے اس قدم کا خیرمقدم کیا ہے۔ ریاست کے اسکولوں میں فی الحال گرمیوں کی چھٹیاں چل رہی ہیں، جنہیں صورتحال کے پیش نظر 31 مئی تک بڑھا دیا گیا ہے۔ اسی دوران کئی اضلاع میں ڈی آئی (اسکول انسپکٹر) اور دیگر حکام کے موبائل اور واٹس ایپ گروپس پر وندے ماترم سے متعلق ایک پیغام بھیجا گیا۔ محکمہ تعلیم کی جانب سے بھیجے گئے اس پیغام کے بارے میں ضلع علی پور دوار کے اسکول انسپکٹر (پرائمری) لکشمن گولے نے بتایا، "اعلیٰ حکام نے ہمیں ایک واٹس ایپ پیغام کے ذریعے اس معاملے پر عمل درآمد کرنے کی ہدایت دی ہے۔" ان کے بقول، اس کے بعد یہ ہدایت نامہ اساتذہ کے مختلف گروپس میں بھیج دیا گیا ہے اور جلد ہی اس سلسلے میں تحریری آرڈر موصول ہو جائے گا، جسے تمام اسکولوں کو ارسال کر دیا جائے گا۔

Source: PC-sangbadpratidin