شوبھندو ادھیکاری نے سندیپ گھوش کے خلاف قانونی کاروائی کےلئے ای ڈی کو اجازت دے دی

بنگال میں حکومت کی تبدیلی کے بعد آر جی کر اسپتال کے سابق پرنسپل سندیپ گھوش کی مشکلات مزید بڑھ گئی ہیں۔ اب ان کے خلاف قانونی کارروائی کرنے کے لیے ای ڈی کو اجازت دے دی گئی ہے۔ وزیر اعلیٰ شبھیندو ادھیکاری نے یہ فیصلہ لیا ہے۔ یعنی سندیپ کے خلاف جاری مالی بے ضابطگیوں اور بدعنوانی کے کیس میں اب مزید سخت موقف اپنایا گیا ہے۔ پیر کے روز نوانّو (سکریٹریٹ) نے اس سلسلے میں فیصلہ کیا ہے۔ یہی نہیں بلکہ وزیر اعلیٰ شبھیندو ادھیکاری نے سوشل میڈیا پر بھی اس حوالے سے پیغام دیا ہے۔ وزیر اعلیٰ نے لکھا، "آج میں بحیثیت وزیر اعلیٰ ایک عظیم اور مثبت قدم اٹھانے پر خود کو خوش قسمت سمجھ رہا ہوں۔ گزشتہ 9 اگست 2024 کو آر جی کر میڈیکل کالج اور اسپتال میں بہن ابھیا کے بہیمانہ قتل اور زیادتی کے واقعے میں، اس وقت کے آر جی کر کے بدنامِ زمانہ سپرنٹنڈنٹ سندیپ گھوش کے خلاف قانونی طریقہ کار کے مطابق ای ڈی کو مذکورہ شخص کے خلاف قانونی کارروائی کرنے اور اسے مجرم ٹھہرانے کی اجازت دے دی گئی ہے۔" واضح رہے کہ آر جی کر کیس دوبارہ کولکتہ ہائی کورٹ میں جا رہا ہے۔ خبروں کے مطابق منگل کے روز دوپہر 1 بجے آر جی کر کیس جسٹس شمپا سرکار اور جسٹس تیتھنکر گھوش کی ڈویڑن بینچ کے سامنے پیش ہو رہا ہے۔ ابھیا کے والدین نے سزا یافتہ سنجے رائے کے لیے پھانسی کا مطالبہ کیا ہے۔ ابھیا کی ماں رتنا دیوناتھ نے اپنی بیٹی کی موت کے لیے انصاف مانگا ہے۔ انہوں نے یہ مطالبہ عوام کی عدالت میں اٹھایا تھا۔ اب وہ اسمبلی انتخابات میں بی جے پی کے ٹکٹ پر پانی ہاٹی حلقے سے امیدوار بن کر کامیاب بھی ہوئی ہیں۔ انہوں نے ریاست کے موجودہ وزیر اعلیٰ شبھیندو ادھیکاری سے آر جی کر معاملے میں انصاف کے لیے اپیل کی ہے۔

Source: PC-sangbadpratidin