ریاست میں مستقل ڈی جی پی کی تقرری کے لیے مرکز نے ناموں کی فہرست طلب کر لی

کولکتہ: ریاست میں مستقل ڈی جی پی کی تقرری کے لیے مرکز نے ناموں کی فہرست طلب کر لی ہے۔ یو پی ایس سی نے ریاستی حکومت کو خط لکھ کر ہدایت دی ہے کہ ڈی جی پی کے خالی عہدے پر تقرری کے لیے 5 فروری 2026 تک ڈی جی کے عہدے پر ترقی پانے والے تمام آئی پی ایس افسران کے نام بھیجے جائیں۔ نوانّہ (ریاستی سیکرٹریٹ) کے ذرائع کے مطابق، یو پی ایس سی کا خط ملنے کے بعد ریاست نے تیاریاں شروع کر دی ہیں اور امکان ہے کہ آئندہ جمعہ تک یہ فہرست بھیج دی جائے گی۔ اس فہرست میں پہلے نمبر پر انوج شرما کا نام ہے، جو اس وقت ڈی جی فائر کے عہدے پر فائز ہیں۔ فہرست میں ریاست کے موجودہ کارگزار ڈی جی پیوش پانڈے کا نام بھی شامل ہے۔ ان کے علاوہ ڈی جی ہوم گارڈ این آر بابو، ڈی جی کریکشنل سروس سدھ ناتھ گپتا، اور ڈائریکٹر سول ڈیفنس سنجے سنگھ سمیت 8 آئی پی ایس افسران کے نام شامل ہیں۔ رواں سال 31 جنوری کو اس وقت کے کارگزار ڈی جی پی راجیو کمار کی ریٹائرمنٹ کے بعد، ریاستی حکومت نے 1993 بیچ کے آئی پی ایس افسر پیوش پانڈے کو کارگزار ڈی جی پی مقرر کیا تھا۔ اس وقت الزام لگایا گیا تھا کہ ریاست کی جانب سے مقررہ وقت کے اندر یو پی ایس سی کو ناموں کی فہرست نہیں بھیجی گئی، جس کی وجہ سے مرکز نے مستقل تقرری کی منظوری دینے سے انکار کر دیا تھا۔ انتظامی کاموں کو جاری رکھنے کے لیے پیوش پانڈے کو کارگزار ذمہ داری دی گئی تھی۔ طویل عرصے سے ڈی جی کی تقرری کو لے کر جاری پیچیدگیاں اب سپریم کورٹ کی مداخلت کے بعد حل ہونے کی امید ظاہر کی جا رہی ہے۔

Source: PC- tv9bangla