ریاستی کابینہ میں ڈے اے پر نہیں ہوئی کوئی بات چیت

پیر کے روز ریاست کی نئی کابینہ کا دوسرا اجلاس منعقد ہوا۔ وزیر اعلیٰ شبھیندو ادھیکاری کی صدارت میں ہونے والی اس میٹنگ میں کئی اہم فیصلے لیے گئے۔ بعد میں ریاست کی وزیر اگنی مترا پال نے ان اعلانات کی تفصیلات میڈیا کے سامنے پیش کیں۔ریاستی حکومت کے ملازمین کے لیے تنخواہوں کے ڈھانچے پر نظرثانی کرنے کی خاطر کابینہ نے ساتواں ریاستی پے کمیشن تشکیل دینے کا فیصلہ کیا ہے۔ تاہم، اس میٹنگ میں ڈی اے کے حوالے سے کوئی بات چیت نہیں ہوئی۔ انپورنا بھنڈار اسکیم کے حوالے سے اگنی مترا پال نے بتایا، "جو خواتین پہلے 'لکشمی بھنڈار' اسکیم کا فائدہ حاصل کر رہی تھیں، ان کے نام اب 'انپورنا بھنڈار' اسکیم میں منتقل کر دیے جائیں گے۔ یہ رقم براہ راست بینک اکاونٹ میں ٹرانسفر کی جائے گی۔ جن لوگوں کو اب تک یہ فائدہ نہیں ملا تھا، وہ بھی جلد ہی نئے پورٹل کے ذریعے درخواست دے سکیں گے۔" انہوں نے مزید واضح کیا کہ جن لوگوں نے سی اے اے کے لیے یا ٹربیونل میں اپیل کر رکھی ہے، وہ بھی اس اسکیم کے اہل ہوں گے۔کابینہ نے 1 جون سے ریاست کی تمام سرکاری بسوں میں خواتین کے لیے مفت سفر فراہم کرنے کی اسکیم کو اصولی طور پر منظوری دے دی ہے۔سرکاری بسوں میں فوری اضافے کے سوال پر وزیر موصوفہ نے کہا، "اس وقت بسوں کی تعداد بڑھانے کا کوئی فیصلہ نہیں ہوا ہے، موجودہ انفراسٹرکچر کا ہی استعمال کیا جائے گا۔ ہم جون میں بجٹ پیش کریں گے۔ وزیر اعلیٰ نے کہا ہے کہ ہم کچھ نئی الیکٹرک بسیں خریدیں گے"۔ کابینہ نے مغربی بنگال حکومت کے تحت ملازمتوں اور سرکاری عہدوں پر او بی سی کے تحفظات کی شرح، ریاستی فہرست میں شامل او بی سی زمروں پر نظرثانی اور ذیلی زمرہ بندی کو منسوخ کرنے کا فیصلہ کیا ہے۔ اگنی مترا پال نے کہا، "اس معاملے پر نئے سرے سے انکوائری ہوگی۔ ہائی کورٹ کی ہدایات کے مطابق جن گروپوں کو شامل کرنے کی بات کہی گئی ہے، ریاستی حکومت اس پر فیصلہ کرے گی"۔ حکومت نے ایک بڑا فیصلہ لیتے ہوئے مذہبی بنیادوں پر مبنی تمام امدادی اسکیموں کو بند کرنے کا اعلان کیا ہے۔ اگنی مترا پال نے واضح کیا، "محکمہ اطلاعات و ثقافت اور محکمہ اقلیتی امور و مدرسہ تعلیم کے تحت مذہبی زمرہ بندی کی بنیاد پر دی جانے والی تمام مالی امداد بند کی جائے گی۔ یہ اسکیمیں اس مہینے چلیں گی لیکن اگلے مہینے سے مکمل طور پر بند کر دی جائیں گی۔ اس کا تفصیلی نوٹیفکیشن جلد جاری ہوگا"۔

Source: PC-sangbadpratidin