سوشل میڈیا پرپوسٹ کرنے کے الزام میں کولکتہ پولیس کا ملازم معطل

سوشل میڈیا پر انتخابی ضابطہ اخلاق کی خلاف ورزی کرنے کے الزام میں کولکتہ پولیس کے ایک ملازم کو معطل کر دیا گیا ہے۔ انتخابات سے عین قبل پولیس انتظامیہ کی جانب سے یہ ایک بڑی تادیبی کارروائی سمجھی جا رہی ہے۔کولکتہ پولیس کے بیان کے مطابق، متعلقہ ملازم نے سوشل میڈیا پر ایک ایسی پوسٹ کی تھی جو 'ماڈل کوڈ آف کنڈکٹ' (آدرش آچرن بدھی) اور سروس رولز کے خلاف تھی۔مذکورہ پولیس اہلکار کے خلاف محکمانہ انکوائری شروع کر دی گئی ہے۔ جب تک یہ تحقیقات مکمل نہیں ہو جاتیں، وہ معطل رہیں گے۔اس واقعے کے فوراً بعد کولکتہ پولیس نے اپنے تمام افسران اور ملازمین کے لیے ایک کڑی ایڈوائزری جاری کی ہے کوئی بھی پولیس اہلکار ایسی کوئی پوسٹ، شیئر یا تبصرہ نہیں کرے گا جو کسی سیاسی جماعت کی حمایت یا مخالفت ظاہر کرے۔انتخابات کے دوران پولیس کا کردار مکمل طور پر غیر جانبدار ہونا چاہیے۔ کسی بھی قسم کا سیاسی جھکاو یا سیاسی رائے کا اظہار برداشت نہیں کیا جائے گا۔تمام اہلکاروں کو ہدایت دی گئی ہے کہ وہ سروس کنڈکٹ رولز کی سختی سے پابندی کریں تاکہ انتخابی عمل کی شفافیت پر کوئی سوال نہ اٹھے۔ کولکتہ پولیس کے ذرائع کا کہنا ہے کہ انتخاب کے وقت امن و امان برقرار رکھنے اور انتظامیہ کی غیر جانبداری کو یقینی بنانا اولین ترجیح ہے۔ اس طرح کی کارروائی سے یہ پیغام دیا گیا ہے کہ ضابطہ اخلاق کی معمولی سی خلاف ورزی پر بھی سخت ایکشن لیا جائے گا۔ مستقبل میں بھی سوشل میڈیا پر کڑی نگرانی رکھنے کا اشارہ دیا گیا ہے۔

Source: PC-sangbadpratidin